19 దేశాల నుంచి 500కుపైగా ఎగ్జిబిటర్లు.. అక్టోబర్ 4 వరకు ప్రదర్శన
షార్జా: షార్జా డిప్యూటీ రూలర్ హెచ్‌.హెచ్‌. షేక్ అబ్దుల్లా బిన్ సలేం బిన్ సుల్తాన్ అల్ ఖాసిమీ 58వ వాచ్ అండ్ జ్యువెలరీ మిడిల్ ఈస్ట్ షోను బుధవారం ప్రారంభించారు. ఎక్స్‌పో సెంటర్ షార్జా ఆధ్వర్యంలో, షార్జా ఛాంబర్ ఆఫ్ కామర్స్ అండ్ ఇండస్ట్రీ సహకారంతో నిర్వహిస్తున్న ఈ ప్రదర్శన అక్టోబర్ 4 వరకు కొనసాగనుంది.

యూఏఈతో పాటు ప్రాంతీయ స్థాయిలో ప్రముఖ వాచ్, జ్యువెలరీ వాణిజ్య ప్రదర్శనగా గుర్తింపు పొందిన ఈ షోలో 19 దేశాల నుంచి 500కుపైగా ఎగ్జిబిటర్లు పాల్గొంటున్నారు. అంతర్జాతీయ కంపెనీలు, ప్రముఖ బ్రాండ్లు తమ వాచీలు, బంగారం, వజ్రాలు, విలువైన రత్నాలు, అరుదైన ఆభరణాలను ప్రదర్శిస్తున్నాయి.

ప్రారంభోత్సవం అనంతరం షేక్ అబ్దుల్లా బిన్ సలేం ప్రదర్శన హాళ్లను సందర్శించి వివిధ దేశాల పావిలియన్లు, ప్రదర్శనలో ఉంచిన ఉత్పత్తుల వైవిధ్యాన్ని పరిశీలించారు. పాల్గొన్న కంపెనీలు, బ్రాండ్ల ప్రతినిధులతో మాట్లాడి ఆభరణాల డిజైన్లు, తయారీ నైపుణ్యాలు, ఆధునిక తయారీ సాంకేతికతలు, మార్కెట్‌లో వస్తున్న తాజా మార్పులు, ప్రపంచవ్యాప్తంగా అభివృద్ధి చెందుతున్న ట్రెండ్స్ గురించి తెలుసుకున్నారు.

ఎమిరాతి డిజైనర్ల ప్రత్యేక ప్రదర్శన
షార్జా బిజినెస్ ఉమెన్ కౌన్సిల్, ఎమిరేటీ గోల్డ్‌స్మిత్స్ స్టాళ్లను కూడా షేక్ అబ్దుల్లా సందర్శించారు. ఎమిరేటీ గోల్డ్‌స్మిత్స్ స్టాల్‌లో ప్రముఖ ఎమిరేటీ మహిళా డిజైనర్లు రూపొందించిన బంగారు ఆభరణాలను ప్రదర్శిస్తున్నారు. ఎమిరేటీ వారసత్వ స్ఫూర్తిని ఆధునిక డిజైన్లతో మేళవించిన ప్రత్యేక ఆభరణాలు ఈ స్టాల్‌లో ఆకట్టుకుంటున్నాయి.
30,000 చదరపు మీటర్ల విస్తీర్ణంలో ప్రదర్శన
ఈ ఏడాది ప్రదర్శన 30,000 చదరపు మీటర్లకు పైగా విస్తీర్ణంలో జరుగుతోంది. హాంకాంగ్, భారత్, ఇటలీ, సింగపూర్, థాయ్‌లాండ్‌కు చెందిన ఐదు అంతర్జాతీయ పావిలియన్లు ఇందులో ప్రత్యేక ఆకర్షణగా నిలుస్తున్నాయి.

వాచీలు, బంగారం, వజ్రాలు, విలువైన రత్నాలు, అత్యాధునిక డిజైన్లతో కూడిన ఆభరణాల విస్తృత కలెక్షన్లను సందర్శకులు వీక్షించే అవకాశం ఉంది. అంతేకాకుండా పరిశ్రమకు చెందిన వ్యాపారులు, నిపుణులు, కొనుగోలుదారులు, సందర్శకులు నేరుగా పరస్పరం కలుసుకునేందుకు ఈ ప్రదర్శన వేదికగా నిలుస్తోంది.

ఈ కార్యక్రమంలో షార్జా ఛాంబర్ ఆఫ్ కామర్స్ అండ్ ఇండస్ట్రీ చైర్మన్ అబ్దుల్లా సుల్తాన్ అల్ ఒవైస్, ఎక్స్‌పో సెంటర్ షార్జా సీఈఓ సైఫ్ మొహమ్మద్ అల్ మిద్ఫా, షార్జా ఛాంబర్ డైరెక్టర్ జనరల్ మొహమ్మద్ అహ్మద్ అల్ అవధీ, ఛాంబర్ బోర్డు సభ్యులు, ప్రభుత్వ అధికారులు, పాల్గొన్న దేశాల దౌత్య ప్రతినిధులు పాల్గొన్నారు.