ఖతార్లో ఈవీ ఛార్జింగ్ నెట్వర్క్ విస్తరణ..!!
- October 04, 2026
దోహా: పర్యావరణహిత రవాణాను ప్రోత్సహించే దిశగా ఖతార్ కీలక చర్యలు చేపడుతోంది. దేశవ్యాప్తంగా ఎలక్ట్రిక్ వాహనాల (EV) వినియోగాన్ని పెంచేందుకు ఛార్జింగ్ మౌలిక వసతులను విస్తరిస్తోంది. ఛార్జింగ్ స్టేషన్ల సంఖ్యను పెంచడంతో పాటు డిజిటల్ సేవలను కూడా మరింత బలోపేతం చేస్తోంది.
ఖతార్ జనరల్ ఎలక్ట్రిసిటీ అండ్ వాటర్ కార్పొరేషన్ (కహ్రామా) ఆధ్వర్యంలో ఈ చర్యలు కొనసాగుతున్నాయి. కతార్ నేషనల్ విజన్ 2030 లక్ష్యాలకు అనుగుణంగా స్థిరమైన రవాణాను ప్రోత్సహించడం, కార్బన్ ఉద్గారాలను తగ్గించడం ఈ కార్యక్రమం ప్రధాన ఉద్దేశమని పేర్కొన్నారు.
పెరుగుతున్న ఈవీ ఛార్జింగ్ స్టేషన్లు
ఖతార్ టీవీకి ఇచ్చిన ఇంటర్వ్యూలో కహ్రామా ఈవీ ఛార్జింగ్ ఇంజినీర్ హెస్సా ఫహద్ అల్ కువారీ మాట్లాడుతూ.. దేశంలో ఈవీ ఛార్జింగ్ మౌలిక వసతులను మరింత అభివృద్ధి చేసి, ఛార్జింగ్ స్టేషన్ల సంఖ్యను పెంచుతున్నట్లు తెలిపారు. ఎలక్ట్రిక్, హైబ్రిడ్ వాహనాలను మరింత మంది వినియోగించేలా ప్రోత్సహించడమే లక్ష్యమని, తద్వారా కార్బన్ ఉద్గారాలను తగ్గించేందుకు సహాయపడుతుందని చెప్పారు. ఈవీ వినియోగదారుల కోసం కహ్రామా Smart EV యాప్ను అందుబాటులోకి తీసుకొచ్చింది. ఇది Google Play Store, App Storeలో అందుబాటులో ఉంది.
ఈ యాప్ ద్వారా వినియోగదారులు:
* తమకు సమీపంలోని ఈవీ ఛార్జింగ్ స్టేషన్ను గుర్తించవచ్చు.
* ప్రస్తుతం ఏ ఛార్జర్లు ఖాళీగా ఉన్నాయో తెలుసుకోవచ్చు.
* తమ వాహనానికి సరిపోయే ఛార్జర్ను ఎంపిక చేసుకోవచ్చు.
* ఛార్జింగ్ ప్రక్రియను యాప్ ద్వారానే నిర్వహించవచ్చు.
* ఛార్జర్ అందుబాటులో ఉందో లేదో రియల్టైమ్లో తెలుసుకోవచ్చు.
నేషనల్ అథెంటికేషన్ ద్వారా యాప్లో లాగిన్ కావచ్చు. కతార్ వెలుపల ఉన్నవారు లేదా నేషనల్ అథెంటికేషన్ అందుబాటులో లేని వారు తమ ఈ-మెయిల్ ద్వారా లాగిన్ కావచ్చని అల్ కువారీ తెలిపారు.
యాప్లో ఛార్జర్ల లభ్యతను రంగుల ద్వారా సులభంగా గుర్తించే విధానం ఉంది.
గ్రీన్: ఛార్జర్ పూర్తిగా అందుబాటులో ఉంది.
ఆరెంజ్: ప్రస్తుతం ఛార్జర్ను మరో వాహనం ఉపయోగిస్తోంది.
గ్రే: ఛార్జర్ నిర్వహణ పనుల్లో ఉంది.
అలాగే ఒక ఛార్జింగ్ స్టేషన్లో మరొక ప్లగ్ అందుబాటులో ఉందా లేదా అనే విషయాన్ని కూడా వినియోగదారులు తెలుసుకోవచ్చు.
80 శాతం ఛార్జింగ్కు 25-40 నిమిషాలు
కహ్రామా ఈవీ ఛార్జింగ్ యూనిట్ ఫస్ట్ ఇంజినీర్ హమద్ అల్ కువారీ మాట్లాడుతూ.. ఛార్జింగ్ నెట్వర్క్ను పర్యవేక్షించేందుకు ప్రత్యేక కంట్రోల్ రూమ్ 24 గంటలూ పనిచేస్తుందని తెలిపారు. ఛార్జర్లలో ఏదైనా సాంకేతిక సమస్య తలెత్తితే ప్రత్యేక బృందాలను వెంటనే పంపించే అవకాశం ఉందన్నారు. సాధారణంగా వాహనాన్ని సుమారు 80 శాతం వరకు ఛార్జ్ చేయడానికి 25 నుంచి 40 నిమిషాలు పట్టవచ్చని వివరించారు.
మూడు నెలలకు ఒకసారి నిర్వహణ
ఈవీ ఛార్జింగ్ స్టేషన్ల పనితీరు సక్రమంగా ఉండేలా కహ్రామా దేశవ్యాప్తంగా ప్రతి మూడు నెలలకు ఒకసారి రెగ్యులర్ మెయింటెనెన్స్ నిర్వహిస్తోంది. మానిటరింగ్ సిస్టమ్ ద్వారా గుర్తించిన లోపాలు లేదా వినియోగదారులు ఫిర్యాదు చేసిన సాంకేతిక సమస్యలకు వెంటనే కరెక్టివ్ మెయింటెనెన్స్ చేపడుతున్నారు. వాహనదారులు ఛార్జింగ్ స్టేషన్కు బయలుదేరే ముందు Smart EV యాప్లో తమ వాహనానికి సరిపోయే ఛార్జింగ్ ప్లగ్ అందుబాటులో ఉందో లేదో చెక్ చేసుకోవాలని కహ్రామా సూచించింది.
ఇతర వాహనదారులకు ఇబ్బంది కలగకుండా.. ఛార్జింగ్ పూర్తయిన తర్వాత ఛార్జింగ్ పరికరాలను తిరిగి వాటి స్థానంలో ఉంచాలని, అలాగే వాహనాన్ని నిర్దేశిత ఛార్జింగ్ స్థలం నుంచి వెంటనే తరలించాలని కహ్రామా సూచించింది. తద్వారా ఇతర వాహనదారులు కూడా ఛార్జింగ్ పాయింట్లను ఉపయోగించుకునే అవకాశం ఉంటుంది.
ఛార్జింగ్ సేవలకు సంబంధించిన సాంకేతిక సమస్యలు, సందేహాలు లేదా ఫిర్యాదుల కోసం వినియోగదారులు కహ్రామా 991 హాట్లైన్ను సంప్రదించవచ్చు. ఛార్జింగ్ స్టేషన్ల విస్తరణ, స్మార్ట్ డిజిటల్ సేవలు, 24 గంటల పర్యవేక్షణ, క్రమం తప్పని నిర్వహణ ద్వారా కతార్లో ఎలక్ట్రిక్ వాహనాల వినియోగానికి అవసరమైన మౌలిక వసతులను మరింత బలోపేతం చేస్తున్నారు. ఇది దేశంలో స్థిరమైన, పర్యావరణహిత రవాణా వ్యవస్థ అభివృద్ధికి దోహదపడనుంది.
తాజా వార్తలు
- విశాఖకు మరో ఐటీ కిరీటం..‘బే-టెక్ సిటీ’ నిర్మాణానికి సీఎం ఆదేశం
- బహ్రెయిన్ ఇండియన్ స్కూల్ ఎన్నికలకు షెడ్యూల్ విడుదల..!!
- మస్కట్లో అల్ ఖువైర్ స్ట్రీట్ ఎగ్జిట్ రాత్రివేళ మూసివేత..!!
- మలేషియా వెళ్లే భారతీయులకు అలర్ట్.. 2027 నుంచి కొత్త రూల్స్
- ఖతార్లో పిల్లలను కారులో వదిలేస్తే QR10,000 జరిమానా..!!
- పాకిస్థాన్లో ఘోర విషాదం..రోడ్డు ప్రమాదంలో 10 మంది మృతి!
- సౌదీ సరిహద్దుల్లో ‘అబ్షర్ ట్రావెల్’ సేవలకు ఎలక్ట్రిక్ బైక్లు..!!
- సౌదీ అరేబియాలో 2027 నుంచి కొత్త టాక్స్ విధానం..!!
- కువైట్లో ఆహార భద్రత తనిఖీలు..!!
- యూఏఈలో ఫైర్ వర్క్స్, డ్రోన్ షోలు, సైనిక పరేడ్లతో సందడి..!!







