కువైట్ : కువైట్‌లో వ్యక్తిగత వినియోగదారుల కోసం అందుబాటులో ఉన్న ఎలక్ట్రానిక్ ‘పేమెంట్ లింక్’ (Links) సేవను త్వరలో నిలిపివేయనున్నారు. కువైట్ సెంట్రల్ బ్యాంక్ ఆదేశాల మేరకు కువైట్ బ్యాంకులు, KNET కలిసి ఈ సేవను నిలిపివేసేందుకు సన్నాహాలు చేస్తున్నాయి. 2015 నుంచి స్థానిక చెల్లింపుల కోసం వినియోగిస్తున్న ఈ సేవను ఎప్పుడు పూర్తిగా నిలిపివేస్తారనే దానిపై ఇంకా నిర్దిష్ట తేదీని ప్రకటించలేదు.

WAMDకు మారాలని సూచన

లింక్స్ సేవను నిలిపివేసే ముందు వినియోగదారులకు అవగాహన కల్పించేందుకు బ్యాంకులు, KNET ప్రత్యేక ప్రచార కార్యక్రమాలు నిర్వహించేందుకు సిద్ధమవుతున్నాయి. సెంట్రల్ బ్యాంక్ అనుమతికి లోబడి ఈ ప్రచారాలు చేపట్టనున్నారు. కస్టమర్లు WAMDకు మారాలని బ్యాంకులు సూచించనున్నాయి. WAMD అనేది కువైట్‌లో తక్షణ చెల్లింపుల కోసం ఉపయోగించే వ్యవస్థ.

చెల్లింపుల భద్రతే ప్రధాన లక్ష్యం

పేమెంట్ లింక్ సేవను నిలిపివేయడం ద్వారా చెల్లింపుల భద్రతను మరింత బలోపేతం చేయడంతో పాటు, నియంత్రణ పర్యవేక్షణను మెరుగుపరచాలని అధికారులు భావిస్తున్నారు. ముఖ్యంగా ప్రతి లావాదేవీలో అసలు లబ్ధిదారుడు ఎవరో స్పష్టంగా గుర్తించే విధానం మరింత పారదర్శకంగా ఉండేలా చర్యలు తీసుకుంటున్నారు.

పేమెంట్ లింక్‌ను ఒకరి నుంచి మరొకరికి, లేదా పలువురు వ్యక్తులకు షేర్ చేసే అవకాశం ఉండటంతో దుర్వినియోగానికి ఆస్కారం ఉంటుందని అధికారులు ఆందోళన వ్యక్తం చేశారు. ముఖ్యంగా అనుమానాస్పద లావాదేవీలు, మనీలాండరింగ్ వంటి కార్యకలాపాల్లో ఈ విధానం దుర్వినియోగం అయ్యే అవకాశం ఉందని పేర్కొన్నారు.

ప్రస్తుతం ఉన్న ‘లింక్స్’ లావాదేవీల ప్రాసెసింగ్ ఖర్చులను ఇంటర్‌బ్యాంక్ క్లియరింగ్ వ్యవస్థ ద్వారా సంబంధిత రెండు బ్యాంకులు భరిస్తున్నాయి.