సూపర్‌స్టార్‌ ప్రశంసపై 'సిల్వర్‌స్టార్‌' సింధు సూపర్‌స్టార్‌ ప్రశంసకు సిల్వర్‌స్టార్‌ ముగ్ధురాలైపోయింది. మాటల్లో వర్ణించలేనంత ఆనందంగా ఉందని ఉప్పొంగిపోతోంది. ఒలింపిక్స్‌ క్రీడాచరిత్రలోనే రజత పతకాన్ని సాధించిన తొలి బ్యాడ్మింటన్ క్రీడాకారిణిగా రికార్డు సృష్టించిన సిల్వర్‌స్టార్‌ సింధుని ప్రశంసిస్తూ 'నేను నీ అభిమానినయ్యా' అంటూ సూపర్‌స్టార్‌ రజనీకాంత్ ట్విట్టర్‌ ద్వారా శుభాకాంక్షలు తెలిపిన విషయం తెలిసిందే. అయితే పతకం గెల్చిన నాటి నుంచి ప్రశంసల వర్షంలో తడిసి ముద్దయిన సింధుకి కాస్త తీరిక దొరకడంతో బుధవారం ట్విట్టర్‌ను తెరచింది. ఇంకేముంది అందులో రజనీకాంత్ ట్వీట్‌ చూసి పట్టరాని ఆనందానికి లోనైంది.'సార్‌.. థాంక్యూ సో మచ్ సార్‌.. మాటలు రావడం లేదు. నా ఆనందాన్ని వర్ణించడానికి మాటలు లేవు' అంటూ రీట్వీట్‌ చేసింది.