మనామా: బహ్రెయిన్‌లోని ప్రాథమిక ఆరోగ్య కేంద్రాల్లో పనిచేసే వైద్యులకు సౌకర్యవంతమైన పని వేళలు (ఫ్లెక్సిబుల్‌ అవర్స్‌) కల్పించే ప్రతిపాదనను ప్రభుత్వం తోసిపుచ్చింది. రోగులకు 24 గంటలూ వైద్య సేవలు అందుబాటులో ఉండాలంటే షిఫ్ట్‌ విధానం తప్పనిసరని స్పష్టం చేసింది. వైద్యుల పని పరిస్థితులు మెరుగుపరచడం, షిఫ్ట్‌ల కేటాయింపులో న్యాయం చేయడం, అదనపు పని గంటలకు తగిన పారితోషికం, సెలవులు కల్పించాలంటూ పార్లమెంటులో వచ్చిన ప్రతిపాదనకు ప్రభుత్వం ఈ మేరకు సమాధానమిచ్చింది.

వారానికి 40 గంటల పని.. అదనంగా 11 శాతం వేతనం

ప్రభుత్వ వివరణ ప్రకారం.. సాధారణ పని వేళల్లో పనిచేసే వైద్యులతో పోలిస్తే షిఫ్ట్‌ విధుల్లో ఉన్న వైద్యులు వారానికి 40 గంటలు పనిచేస్తున్నారు. ఇది సాధారణ విధుల్లో ఉన్నవారి కంటే నాలుగు గంటలు ఎక్కువ. అయితే, షిఫ్ట్‌ విధుల్లో పనిచేసే వైద్యులకు సుమారు 11 శాతం అధిక వేతనం లభిస్తోంది. అంతేకాకుండా రెండో షిఫ్ట్‌లో పనిచేసేవారికి 12.5 శాతం, మూడో షిఫ్ట్‌ లేదా రాత్రి విధుల్లో పనిచేసేవారికి 25 శాతం అదనపు భత్యం చెల్లిస్తున్నారు. సాధారణ పని వేళలకు మించి విధులకు హాజరు కావాల్సి వస్తే పౌర సేవా చట్టం ప్రకారం ఓవర్‌టైమ్‌ చెల్లింపులు కూడా ఉంటాయని ప్రభుత్వం తెలిపింది.

ఐదు రోజుల పని.. రెండు రోజుల సెలవు

వైద్యులు వారానికి ఐదు రోజులు పనిచేసి, రెండు రోజులు సెలవు పొందుతారని ప్రభుత్వం వెల్లడించింది. ఉదయం, సాయంత్రం, రాత్రి షిఫ్ట్‌లను మారుస్తూ విధులు కేటాయిస్తారని తెలిపింది. దీనివల్ల ఏ వైద్యుడూ నిరవధికంగా రాత్రి విధుల్లో కొనసాగాల్సిన పరిస్థితి ఉండదని వివరించింది. ప్రతి నెలా ఆరోగ్య కేంద్రం అధిపతి డ్యూటీ షెడ్యూల్ ను రూపొందిస్తారు. అనంతరం ఆరోగ్య జిల్లా అధిపతి దానిని పరిశీలించి ఆమోదిస్తారు. తదుపరి నెలలో తమకు కేటాయించిన షిఫ్ట్‌ల వివరాలను వైద్యులకు ముందుగానే అందజేస్తారు.

ఆరోగ్య కేంద్రాల్లో తగినంత మంది వైద్యులు అందుబాటులో ఉండటంతో పాటు, అన్ని వేళల్లోనూ రోగులకు చికిత్స అందించాలనే ఉద్దేశంతో ప్రస్తుత విధానాన్ని రూపొందించినట్లు ప్రభుత్వం పేర్కొంది. షిఫ్ట్‌ విధులు, అదనపు భత్యాలు, ఓవర్‌టైమ్‌ చెల్లింపులు, పదోన్నతుల్లో మార్పులు ఇప్పటికే వైద్యుల అవసరాలను తీర్చుతున్నాయని ప్రభుత్వం అభిప్రాయపడింది. వైద్యుల హక్కులను పరిరక్షిస్తూనే, రోగులకు నిరంతర వైద్య సేవలు అందించేందుకు ప్రస్తుత నిబంధనలు అవసరమని స్పష్టం చేసింది.