రియాద్‌: సౌదీ అరేబియా రాజధాని రియాద్‌లో హూతీ తిరుగుబాటుదారులు ప్రయోగించిన క్షిపణులను వైమానిక రక్షణ వ్యవస్థ అడ్డుకోవడంతో వాటి శకలాలు నివాస ప్రాంతాలపై పడ్డాయి. ఈ ఘటనలో ఇద్దరు మహిళలు, ఒక పురుషుడు, ఒక చిన్నారి సహా నలుగురు గాయపడ్డారు. శకలాలు పడటంతో 15 ఇళ్లు స్వల్పంగా దెబ్బతిన్నట్లు సౌదీ పౌర రక్షణ విభాగం బుధవారం వెల్లడించింది.

అధికారుల వివరాల ప్రకారం.. అక్టోబర్‌ 13న సౌదీ రాజధానిని లక్ష్యంగా చేసుకుని హూతీ మిలీషియా రెండు క్రూయిజ్‌ క్షిపణులను ప్రయోగించింది. అప్రమత్తమైన సౌదీ వైమానిక రక్షణ వ్యవస్థ ఆ క్షిపణులను గాల్లోనే అడ్డుకుని ధ్వంసం చేసింది. అయితే, వాటి శకలాలు సమీపంలోని నివాస ప్రాంతాల్లో పడటంతో నలుగురు గాయపడగా, 15 ఇళ్లకు స్వల్పంగా ఆస్తి నష్టం వాటిల్లింది. ఈ ఘటన నేపథ్యంలో సంబంధిత అధికారులు ముందస్తు భద్రతా చర్యలు, అత్యవసర విధానాలను అమలు చేసినట్లు సౌదీ పౌర రక్షణ విభాగం అధికార ప్రతినిధి తెలిపారు.

కొనసాగుతున్న క్షిపణి, డ్రోన్‌ దాడులు

సౌదీ అరేబియాపై హూతీ తిరుగుబాటుదారుల క్షిపణి, డ్రోన్‌ దాడుల పరంపర కొనసాగుతున్న నేపథ్యంలో తాజా ఘటన చోటుచేసుకుంది. రియాద్‌తో పాటు తూర్పు ప్రావిన్స్‌ ప్రాంతాల్లోనూ క్షిపణులను అడ్డుకున్న ఘటనలు ఇటీవల చోటుచేసుకున్నాయి. క్షిపణులను అడ్డుకోవడంలో వైమానిక రక్షణ వ్యవస్థలు కీలక పాత్ర పోషిస్తున్నప్పటికీ, వాటి శకలాలు జనావాసాలపై పడటం ప్రజల్లో ఆందోళన కలిగిస్తోంది.