కువైట్ : కువైట్‌లోని హవల్లీ గవర్నరేట్ పరిధిలో నిబంధనలు ఉల్లంఘించిన ప్రజా రవాణా బస్సులపై ట్రాఫిక్ పోలీసులు భారీ స్థాయిలో తనిఖీలు నిర్వహించారు. ఈ తనిఖీల్లో 27 బస్సులను సీజ్ చేయడంతో పాటు వివిధ ట్రాఫిక్ ఉల్లంఘనలకు సంబంధించి 364 కేసులు నమోదు చేశారు. జనరల్ ట్రాఫిక్ డిపార్ట్‌మెంట్‌కు చెందిన హవల్లీ ట్రాఫిక్ విభాగం ఆధ్వర్యంలో ఈ ప్రత్యేక తనిఖీలను నిర్వహించినట్లు అధికారులు తమ అధికారిక ఇన్‌స్టాగ్రామ్ ఖాతాలో వెల్లడించారు. జనరల్ ట్రాఫిక్ డిపార్ట్‌మెంట్ డైరెక్టర్ జనరల్ బ్రిగేడియర్ జనరల్ రషీద్ హమూద్ అల్-హజ్రీ పర్యవేక్షణలో, ట్రాఫిక్ నియంత్రణ వ్యవహారాల అసిస్టెంట్ డైరెక్టర్ జనరల్ కల్నల్ అయూబ్ ఘాజీ ఫతల్లా ఆధ్వర్యంలో ఈ కార్యక్రమం చేపట్టారు.

ప్రజా రవాణా బస్సులు ట్రాఫిక్ నిబంధనలు పాటిస్తున్నాయా లేదా అనే అంశంపై అధికారులు ప్రత్యేకంగా దృష్టి సారించారు. ప్రయాణికుల రవాణాకు సంబంధించిన నిబంధనలను ఉల్లంఘించిన వాహనాలను గుర్తించి చర్యలు తీసుకున్నారు.ఈ తనిఖీల్లో సాధారణ ట్రాఫిక్ నిబంధనల ఉల్లంఘనలకు సంబంధించి 338 కేసులు, మోటారు వాహనాలను నిబంధనలకు విరుద్ధంగా రవాణా కోసం వినియోగించినందుకు 26 కేసులు, డ్రైవింగ్ లైసెన్స్ లేకుండా వాహనం నడిపినందుకు ఒక కేసు నమోదు చేసినట్లు అధికారులు తెలిపారు. మొత్తంగా 27 బస్సులను స్వాధీనం చేసుకోగా, చట్టపరమైన చర్యల నిమిత్తం 27 మందిని ట్రాఫిక్ డిటెన్షన్ కేంద్రానికి తరలించారు.రోడ్డు భద్రతను మెరుగుపరచడం, ప్రజా రవాణా వాహనాలు నిబంధనలకు అనుగుణంగా నడిచేలా చూడటం, ప్రయాణికులతో పాటు ఇతర రహదారి వినియోగదారుల భద్రతను కాపాడటమే ఈ ప్రత్యేక తనిఖీల ప్రధాన ఉద్దేశమని అధికారులు పేర్కొన్నారు.