మస్కట్: విదేశాల్లో వివాహం చేసుకోవాలనుకునే ఒమన్ పౌరులకు వివాహానికి ముందు వైద్య పరీక్షలు, ధ్రువీకరణకు సంబంధించిన విధివిధానాలను ఒమన్ ఆరోగ్య మంత్రిత్వ శాఖ వెల్లడించింది. కాబోయే జీవిత భాగస్వామి ఒమన్ పౌరుడైనా, విదేశీయుడైనా ఈ నిబంధనలు వర్తిస్తాయని స్పష్టం చేసింది. రాయల్ డిక్రీ 111/2025 ప్రకారం, వివాహ ఒప్పందం ఖరారు కావడానికి ముందే వధూవరులిద్దరూ నిర్దేశిత ప్రీ-మ్యారిటల్ వైద్య పరీక్షలు చేయించుకోవాలి. ఈ పరీక్షలు ఒమన్‌లో చేయించుకున్నా, విదేశాల్లో చేయించుకున్నా మంత్రిత్వ శాఖ సూచించిన విధివిధానాలను తప్పనిసరిగా పాటించాలి.

విదేశాల్లో పరీక్షలు చేయించుకుంటే..

విదేశాల్లో వైద్య పరీక్షలు చేయించుకునే వారు జన్యుపరమైన రక్త సంబంధిత వ్యాధులు, అంటువ్యాధులకు సంబంధించిన అన్ని నిర్దేశిత ల్యాబొరేటరీ పరీక్షలను ఆయా దేశాల్లో గుర్తింపు పొందిన వైద్య సంస్థల్లో చేయించుకోవాలి.పరీక్షల నివేదికలకు సంబంధిత ధ్రువీకరణలు తప్పనిసరి. పరీక్షలు నిర్వహించిన వైద్య సంస్థ, ఆ దేశానికి చెందిన సంబంధిత ఆరోగ్య శాఖ, ఒమన్ విదేశాంగ మంత్రిత్వ శాఖ నుంచి నివేదికలకు ధ్రువీకరణ పొందాలి.

ఒమన్‌లో సర్టిఫికెట్ ఎలా పొందాలి?

విదేశాల్లో పరీక్షలు చేయించుకున్న వారు ప్రీ-మ్యారిటల్ మెడికల్ సర్టిఫికెట్ పొందేందుకు ఒమన్ ఆరోగ్య మంత్రిత్వ శాఖ ఆమోదించిన ప్రభుత్వ వైద్య కేంద్రాన్ని సందర్శించాలి. అక్కడ అధికారులు విదేశాల్లో నిర్వహించిన పరీక్షల ఫలితాలను పరిశీలించి, అధికారికంగా నమోదు చేస్తారు. అనంతరం వివాహానికి ముందు వైద్యపరమైన కౌన్సెలింగ్ అందించి సర్టిఫికెట్ జారీ చేస్తారు. ప్రీ-మ్యారిటల్ స్క్రీనింగ్ సేవలను ఎలక్ట్రానిక్ హెల్త్ ప్లాట్‌ఫామ్‌లో అందుబాటులోకి తీసుకువచ్చే వరకు ఈ విధానాలు అమల్లో ఉంటాయని మంత్రిత్వ శాఖ తెలిపింది.

11 గవర్నరేట్లలో 40 ప్రభుత్వ వైద్య కేంద్రాలు

విదేశాల్లో నిర్వహించిన వైద్య పరీక్షల నివేదికలను పరిశీలించి, ధ్రువీకరించేందుకు ఒమన్‌లోని 11 గవర్నరేట్ల పరిధిలో 40 ఆమోదిత ప్రభుత్వ వైద్య సంస్థల జాబితాను మంత్రిత్వ శాఖ విడుదల చేసింది.విదేశాల్లో పొందిన వైద్య పరీక్షల ఫలితాలను సక్రమంగా ధ్రువీకరించి, అధికారికంగా నమోదు చేసిన తర్వాతే ఒమన్‌లో ప్రీ-మ్యారిటల్ మెడికల్ సర్టిఫికెట్ జారీ చేసేలా ఈ విధానాలను రూపొందించినట్లు అధికారులు తెలిపారు.