అబుధాబి: యూఏఈ అధ్యక్షుడు షేక్ మహమ్మద్ బిన్ జాయెద్ అల్ నహ్యాన్‌తో ఫ్రాన్స్ అధ్యక్షుడు ఇమ్మాన్యుయేల్ మాక్రాన్ అబుధాబిలో సమావేశమయ్యారు. ఇరు దేశాల మధ్య ద్వైపాక్షిక సంబంధాలను మరింత బలోపేతం చేయడం, కీలక రంగాల్లో పరస్పర సహకారాన్ని విస్తరించడంపై ఇరువురు నేతలు చర్చించారు. గల్ఫ్ దేశాల పర్యటనలో భాగంగా మాక్రాన్ యూఏఈలో అధికారిక పర్యటన చేపట్టారు. ఈ సందర్భంగా ఆర్థిక వ్యవహారాలు, పెట్టుబడులు, ఇంధనం, అధునాతన సాంకేతిక పరిజ్ఞానం, ఏఐ రంగాల్లో సహకారాన్ని మరింత పెంచుకునే మార్గాలపై ఇరువురు నేతలు సమీక్షించారు. ముఖ్యంగా ఇంధనం, ఆధునిక సాంకేతిక పరిజ్ఞానం, ఏఐ రంగాల్లో భాగస్వామ్యానికి ప్రాధాన్యత ఇవ్వాలని నిర్ణయించారు.

మిడిలీస్టు పరిస్థితులపైనా చర్చలు

భేటీ సందర్భంగా ప్రాంతీయ, అంతర్జాతీయ పరిణామాలపై కూడా ఇరువురు చర్చించారు. ముఖ్యంగా మిడిలీస్టులో నెలకొన్న పరిస్థితులు, వాటి ప్రభావం సముద్ర భద్రతపై పడకుండా తీసుకోవాల్సిన చర్యలు, ప్రపంచ ఇంధన సరఫరాల స్థిరత్వం వంటి అంశాలపై ఇరువురు నేతలు అభిప్రాయాలను పంచుకున్నారు. ప్రాంతీయ దేశాలు, ప్రజల ప్రయోజనాలను దృష్టిలో ఉంచుకుని భద్రత, స్థిరత్వం, శాంతిని ప్రోత్సహించేందుకు పరస్పర సమన్వయాన్ని కొనసాగించాల్సిన అవసరం ఉందని అభిప్రాయపడ్డారు. అనంతరం మాక్రాన్ గౌరవార్థం షేక్ మహమ్మద్ ప్రత్యేక విందును ఏర్పాటు చేశారు. ఈ సందర్భంగా ఫ్రాన్స్ అధ్యక్షుడు వీఐపీ సందర్శకుల పుస్తకంలో సంతకం చేశారు. యూఏఈ-ఫ్రాన్స్ సంబంధాలు నిరంతరం అభివృద్ధి చెందుతుండటంపై ఆయన హర్షం వ్యక్తం చేస్తూ, భవిష్యత్తులో ఇరు దేశాల మధ్య సంబంధాలు మరింత బలోపేతం కావాలని ఆకాంక్షించారు.

గల్ఫ్ దేశాల్లో మాక్రాన్ పర్యటన

యూఏఈ పర్యటనకు ముందు మాక్రాన్ కువైట్‌లో పర్యటించారు. అక్కడ కువైట్ అమీర్ షేక్ మిషాల్ అల్ అహ్మద్ అల్ జాబర్ అల్ సబా ఆయనకు స్వాగతం పలికారు. ప్రాంతీయ భాగస్వామ్య దేశాలతో ఆర్థిక, రక్షణ రంగాల సంబంధాలను బలోపేతం చేయడం లక్ష్యంగా మాక్రాన్  తన గల్ఫ్ పర్యటనను ప్రారంభించారు. ఈ పర్యటనలో భాగంగా బహ్రెయిన్, ఖతార్ దేశాలను కూడా బుధవారం నాటికి సందర్శించనున్నారు. ఫిబ్రవరిలో ప్రారంభమైన అమెరికా-ఇరాన్ యుద్ధానికి సంబంధించిన ప్రాంతీయ ఉద్రిక్తతల నేపథ్యంలో ఈ పర్యటన ప్రాధాన్యత సంతరించుకుంది.