కువైట్‌: దేశంలోని జ్లీబ్ అల్‌ షుయూఖ్‌ ప్రాంతంలో నిబంధనలకు విరుద్ధంగా నిర్మించిన 757 భవనాలను కూల్చివేసేందుకు కువైట్‌ మున్సిపాలిటీ చర్యలు ప్రారంభించింది. అక్రమ నిర్మాణాలను తొలగించేందుకు చేపట్టిన ప్రభుత్వ ప్రణాళికలో భాగంగా ఈ కార్యక్రమాన్ని అమలు చేస్తోంది.

తొలిదశలో 263 భవనాలకు కూల్చివేత ఉత్తర్వులు జారీ చేశారు. వీటికి సంబంధించిన హెచ్చరికలను అధికారిక గెజిట్‌లో ప్రచురించారు. యజమానులు స్వచ్ఛందంగా నిర్మాణాలను తొలగించకపోవడంతో, అవసరమైన చట్టపరమైన ప్రక్రియలు పూర్తయ్యాక అధికారులు కూల్చివేత చర్యలు చేపట్టారు.

మొత్తం మూడు దశల్లో ఈ కార్యక్రమాన్ని అమలు చేయనున్నారు. మొదటి దశలో 263 భవనాల కూల్చివేత ప్రక్రియ కొనసాగుతోంది. రెండో దశలో మరో 494 భవనాలను కూల్చివేయనున్నారు. కువైట్‌ మున్సిపాలిటీ డైరెక్టర్‌ జనరల్‌ ఆమోదిత ఉత్తర్వులు జారీ చేసిన తర్వాత మూడు వారాల్లో ఈ ప్రక్రియ ప్రారంభమయ్యే అవకాశం ఉంది.

కూల్చివేత ఖర్చులు యజమానులదే

నిబంధనలను ఉల్లంఘించిన భవనాల యజమానులే కూల్చివేత, శిథిలాల తొలగింపు ఖర్చులను పూర్తిగా భరించాలని అధికారులు స్పష్టం చేశారు. భవనం అంతస్తుల సంఖ్య, విస్తీర్ణం, అవసరమైన యంత్రాలు, శిథిలాలను తరలించే మార్గాలు తదితర అంశాల ఆధారంగా ఖర్చులను లెక్కించనున్నారు. జ్లీబ్‌ అల్‌ షుయూఖ్‌ ప్రాంతంలో అక్రమ నిర్మాణాలను తొలగించి, భవన నిర్మాణ నిబంధనలను కచ్చితంగా అమలు చేయడమే ఈ చర్యల ప్రధాన ఉద్దేశమని అధికారులు తెలిపారు.