న్యూ ఢిల్లీ:  దేశంలోని విమానాశ్రయాల నిర్వహణను మరింత ఆధునీకరించి, ప్రయాణికులకు అంతర్జాతీయ స్థాయి మౌలిక వసతులు అందించేందుకు కేంద్ర ప్రభుత్వం కీలక నిర్ణయం తీసుకుంది. ప్రస్తుతం ఎయిర్‌పోర్ట్స్ అథారిటీ ఆఫ్ ఇండియా (AAI) నిర్వహణలో ఉన్న 11 ప్రధాన విమానాశ్రయాలను పబ్లిక్-ప్రైవేట్ పార్ట్‌నర్‌షిప్ (PPP) పద్ధతిలో ప్రైవేట్ ఆపరేటర్లకు అప్పగించేందుకు సన్నాహాలు వేగవంతం చేసింది. ఇందులో భాగంగా డిసెంబర్ 2026 నాటికి గ్లోబల్ బిడ్లను ఆహ్వానించాలని యోచిస్తోంది.

 50 ఏళ్ల దీర్ఘకాలిక లీజు.. క్రాస్ సబ్సిడీ నమూనా
ఈ 11 విమానాశ్రయాలను 50 సంవత్సరాల దీర్ఘకాలిక రాయితీ (Long-term Concession) ప్రాతిపదికన ప్రైవేట్ సంస్థలకు అప్పగించనున్నారు. పబ్లిక్-ప్రైవేట్ పార్ట్‌నర్‌షిప్ అప్రైజల్ కమిటీ (PPPAC) ఇప్పటికే ఈ ప్రతిపాదనకు ఆమోదం తెలిపింది.

విమానాశ్రయాల నిర్వహణ సమర్థవంతంగా సాగేందుకు ప్రభుత్వం ఒక వినూత్న వ్యూహాన్ని అమలు చేస్తోంది. ఈ 11 విమానాశ్రయాలను 5 బండిల్స్ (సమూహాలు) గా విభజించారు. ప్రతి బండిల్‌లోనూ రద్దీ ఎక్కువగా ఉండే ఒక పెద్ద విమానాశ్రయంతో పాటు, తక్కువ ప్రయాణికుల రాకపోకలు ఉండే ఒక చిన్న విమానాశ్రయాన్ని జత చేశారు. పెద్ద విమానాశ్రయం ద్వారా వచ్చే ఆదాయంతో చిన్న విమానాశ్రయాల నిర్వహణ, అభివృద్ధి చేపడతారు.

ప్రైవేటీకరణకు ప్రతిపాదించిన 11 విమానాశ్రయాల జాబితా
ప్రైవేటీకరణ కోసం మొత్తం 11 విమానాశ్రయాలను ఐదు బండిళ్లుగా విభజించారు. ఇందులో మొదటి బండిల్‌లో పంజాబ్‌లోని అమృత్‌సర్, హిమాచల్ ప్రదేశ్‌లోని కాంగ్రా-గగ్గల్ ఉన్నాయి. రెండో బండిల్‌లో ఉత్తరప్రదేశ్‌కు చెందిన వారణాసి, ఖుషినగర్‌తో పాటు బీహార్‌లోని గయా విమానాశ్రయాలను చేర్చారు. మూడో బండిల్‌లో ఒడిశాలోని భువనేశ్వర్, కర్ణాటకలోని హుబ్బళ్లి, నాలుగో బండిల్‌లో ఛత్తీస్‌గఢ్‌లోని రాయ్‌పూర్, మహారాష్ట్రలోని ఛత్రపతి శంభాజీనగర్ (ఔరంగాబాద్) ఉన్నాయి. ఇక ఐదో బండిల్‌లో తమిళనాడులోని తిరుచిరాపల్లి, ఆంధ్రప్రదేశ్‌లోని తిరుపతి విమానాశ్రయాలకు చోటు కల్పించారు.

దేశంలో వేగంగా విస్తరిస్తున్న విమానాశ్రయాల నెట్‌వర్క్
ప్రస్తుతం భారతదేశంలో 14 విమానాశ్రయాలు పీపీపీ (PPP) నమూనాలో విజయవంతంగా పనిచేస్తున్నాయి. ఢిల్లీ, ముంబై, హైదరాబాద్, బెంగళూరు, అహ్మదాబాద్, లక్నో, గోవా (మోపా) వంటి ప్రధాన నగరాల ఎయిర్‌పోర్టులు ఈ జాబితాలో ఉన్నాయి.

పౌర విమానయాన మంత్రిత్వ శాఖ గణాంకాల ప్రకారం జూలై 2026 నాటికి దేశంలో పనిచేస్తున్న మొత్తం విమానాశ్రయాల సంఖ్య 165కి చేరింది. పెరుగుతున్న ప్రయాణికుల రద్దీకి అనుగుణంగా మరో 60కి పైగా విమానాశ్రయాలు ప్రస్తుతం నిర్మాణ దశలో ఉన్నాయి. కొత్తగా చేపట్టనున్న ఈ 11 విమానాశ్రయాల ప్రైవేటీకరణతో దేశీయ విమానయాన రంగం మరింత ఆధునికీకరణ వైపు పయనిస్తుందని అధికారులు ధీమా వ్యక్తం చేస్తున్నారు.