ఆంధ్రప్రదేశ్, తెలంగాణ రాష్ట్రాల ఓటర్లకు కేంద్ర ఎన్నికల సంఘం (ECI) కీలక అప్‌డేట్ ఇచ్చింది. రెండు రాష్ట్రాల్లో ఓటర్ల జాబితా ప్రత్యేక సవరణ (SIR) కార్యక్రమ షెడ్యూల్‌ను మరోసారి మార్చింది. రాష్ట్రాల ప్రధాన ఎన్నికల అధికారులు (CEO) చేసిన విజ్ఞప్తుల మేరకు ఈ నిర్ణయం తీసుకుంది. తాజా షెడ్యూల్ ప్రకారం ఏపీ, తెలంగాణలో ఓటర్ల తుది జాబితాను నవంబర్ 30న ప్రచురించనున్నారు.

అభ్యంతరాల పరిష్కారానికి అదనపు గడువు

ఓటర్ల జాబితాలో పేర్ల చేర్పులు, మార్పులకు సంబంధించి వచ్చిన క్లెయిమ్‌లు, అభ్యంతరాలను పరిష్కరించేందుకు ఎన్నికల సంఘం గడువును పొడిగించింది. తాజా నిర్ణయం ప్రకారం తెలంగాణలో నవంబర్ 26 వరకు, ఆంధ్రప్రదేశ్‌లో నవంబర్ 20 వరకు ఈ ప్రక్రియ కొనసాగనుంది. వాస్తవానికి పాత షెడ్యూల్ ప్రకారం తెలంగాణలో నవంబర్ 9న, ఆంధ్రప్రదేశ్‌లో అక్టోబర్ 30న తుది ఓటర్ల జాబితా విడుదల కావాల్సి ఉంది. అయితే క్షేత్రస్థాయిలో సవరణ ప్రక్రియ ఇంకా పూర్తికాకపోవడంతో రెండు రాష్ట్రాల CEOలు గడువు పొడిగించాలని కోరారు. వారి విజ్ఞప్తులను పరిశీలించిన ఈసీ కొత్త షెడ్యూల్‌ను ప్రకటించింది. సవరించిన తేదీలను క్షేత్రస్థాయి అధికారులకు తెలియజేయాలని, మీడియా ద్వారా ప్రజలకు విస్తృతంగా ప్రచారం కల్పించాలని ఎన్నికల సంఘం ఆదేశించింది. అలాగే కొత్త షెడ్యూల్ వివరాలను రాజకీయ పార్టీలకు కూడా రాతపూర్వకంగా అందించాలని సూచించింది.

తెలంగాణలో ఓటర్ల జాబితా వివరాలు

ప్రత్యేక సవరణ ప్రక్రియ ప్రారంభానికి ముందు తెలంగాణలో మొత్తం 3,38,26,448 మంది ఓటర్లు ఉన్నారు. వీరిలో 2,64,87,213 మంది మాత్రమే తమ వివరాలను నమోదు చేసుకున్నారు. మిగిలిన 73,39,235 మందిని వలస వెళ్లినవారు, మరణించినవారు, చిరునామా మారినవారు, నకిలీ ఓట్లకు సంబంధించిన ASDD కేటగిరీల్లో గుర్తించి డ్రాఫ్ట్ జాబితా నుంచి తొలగించారు. అక్టోబర్ 29 నాటికి అందిన వివరాల ప్రకారం.. తెలంగాణలో జారీ చేసిన 92,88,188 నోటీసుల్లో 92,81,189 నోటీసులను ఓటర్లకు అందజేశారు. వీటిలో 92,08,443 నోటీసులపై విచారణ పూర్తయింది. ఇప్పటివరకు మొత్తం 2,59,22,684 మంది ఓటర్ల పేర్లను తుది జాబితాలో చేర్చేందుకు అధికారులు ఆమోదం తెలిపారు. వీరిలో 59,31,395 మంది ఓటర్లకు సంబంధించిన సాంకేతిక సమస్యలను పరిష్కరించారు. మరో 30,64,168 మందిని 2002 నాటి ఓటర్ల జాబితాతో మ్యాపింగ్ చేశారు. విచారణ అనంతరం 50,690 మంది ఓటర్లు జాబితాలో చేరేందుకు అర్హులు కారని అధికారులు గుర్తించారు.మ్యాప్‌లు చూడండి

ఆంధ్రప్రదేశ్‌లో పరిస్థితి ఇదీ

ఆంధ్రప్రదేశ్‌లోనూ ఓటర్ల జాబితా సవరణ ప్రక్రియ కొనసాగుతోంది. అందిన సమాచారం ప్రకారం రాష్ట్రంలో 44,28,858 నోటీసులపై విచారణ పూర్తయింది. వీరిలో 42,55,630 మంది ఓటర్ల పేర్లను తుది జాబితాలో చేర్చేందుకు ఆమోదం లభించింది. పరిశీలన అనంతరం 1,73,662 మంది ఓటర్లు జాబితాలో చోటు దక్కించుకోవడానికి అర్హులు కారని అధికారులు నిర్ధారించారు.

నవంబర్ 30న తుది జాబితా

తాజా షెడ్యూల్ ప్రకారం ఆంధ్రప్రదేశ్, తెలంగాణలో నవంబర్ 30న తుది ఓటర్ల జాబితా ప్రచురితం కానుంది. ఈ నేపథ్యంలో ఓటర్లు తమ పేర్లు, చిరునామా వివరాలు సరిగా ఉన్నాయో లేదో పరిశీలించుకోవాలి. ఏవైనా తప్పులు ఉంటే నిర్ణీత గడువులోగా సంబంధిత అధికారులను సంప్రదించి సవరణల కోసం దరఖాస్తు చేసుకోవాలి.