దుబాయ్: యూఏఈ జెండా దినోత్సవాన్ని పురస్కరించుకుని దుబాయ్‌లోని గ్లోబల్ విలేజ్ ప్రత్యేక వేడుకలకు సిద్ధమైంది. నవంబర్ 3న రాత్రి 8 గంటలకు 700 డ్రోన్లతో అద్భుతమైన లైట్ షో నిర్వహించనుంది. ఈ ప్రదర్శనలో ఎరుపు, ఆకుపచ్చ, తెలుపు, నలుపు రంగుల్లో వెలుగులు విరజిమ్మే 700 డ్రోన్లు ఆకాశంలో యూఏఈ జాతీయ జెండా రంగులను ప్రతిబింబించే ఆకృతులను రూపొందించనున్నాయి. 

ఈ వేడుకల్లో భాగంగా గ్లోబల్ విలేజ్ అంతటా యూఏఈ జాతీయ జెండాలను ప్రదర్శించనున్నారు. ప్రముఖ ప్రదేశాలను జాతీయ జెండా రంగులతో అలంకరించనున్నారు. సందర్శకులకు ప్రవేశ ద్వారాల వద్ద జెండాలను అందజేయనున్నారు. యూఏఈ సంప్రదాయాలు, సంస్కృతిని తెలుసుకోవాలనుకునే వారి కోసం ఎమిరాటీ పెవిలియన్‌లో ప్రత్యేక ఏర్పాట్లు చేశారు. అక్కడ సంప్రదాయ హస్తకళలు, స్థానిక ఉత్పత్తులు, ప్రత్యేక ఆహార పదార్థాలు అందుబాటులో ఉంటాయి. సందర్శకులు స్థానిక రుచులను ఆస్వాదించడంతో పాటు దేశ వారసత్వాన్ని తెలుసుకోవచ్చు.

గ్లోబల్ విలేజ్‌లోని అంతర్జాతీయ షాపింగ్, ఆహార కేంద్రాలను కూడా సందర్శకులు ఆస్వాదించవచ్చు. టికెట్లను గ్లోబల్ విలేజ్ అధికారిక వెబ్‌సైట్, మొబైల్ యాప్ లేదా ప్రవేశ ద్వారాల వద్ద ఉన్న టికెట్ కౌంటర్ల ద్వారా కొనుగోలు చేయవచ్చు. మరిన్ని వివరాలను globalvillage.ae వెబ్‌సైట్‌లో తెలుసుకోవచ్చని నిర్వాహకులు వెల్లడించారు.