మస్కట్: ప్రాంతీయ ఉద్రిక్తతలను తగ్గించేందుకు ఒమన్ చేస్తున్న ప్రయత్నాలను ఫ్రాన్స్ ప్రశంసించింది. ఈ మేరకు ఒమన్ విదేశాంగ మంత్రిత్వ శాఖ రాజకీయ వ్యవహారాల అండర్ సెక్రటరీ షేక్ ఖలీఫా బిన్ అలీ అల్ హార్తీతో ఫ్రాన్స్ రక్షణ మంత్రిత్వ శాఖ అంతర్జాతీయ సంబంధాలు, వ్యూహాల డైరెక్టర్ జనరల్ గియోమ్ ఒల్లానియర్ భేటీ అయ్యారు.

ఈ సమావేశంలో ప్రాంతంలో వేగంగా మారుతున్న పరిణామాలతో పాటు ఇరు దేశాలకు సంబంధించిన పలు ఉమ్మడి అంశాలపై చర్చించారు. ప్రాంతీయ ఉద్రిక్తతలను తగ్గించేందుకు, వివాదాల పరిష్కారానికి మధ్యవర్తిత్వం వహించేందుకు ఒమన్ చేస్తున్న కృషిని ఫ్రాన్స్ అధికారి ప్రత్యేకంగా ప్రశంసించారు. ఈ విషయంలో ఒమన్ పోషిస్తున్న సానుకూల పాత్రను తమ దేశం అభినందిస్తోందని తెలిపారు.