మనామా: ప్రపంచ ఈ-పార్లమెంట్ సదస్సు–2026లో పాల్గొనేందుకు బహ్రెయిన్ పార్లమెంటరీ విభాగం సన్నాహాలు ప్రారంభించింది. ఈ నేపథ్యంలో ముందస్తు సమావేశాన్ని నిర్వహించింది. నవంబర్ 17, 18 తేదీల్లో బెల్జియంలోని బ్రస్సెల్స్‌లో ఈ అంతర్జాతీయ సదస్సు జరగనుంది. ఇంటర్ పార్లమెంటరీ యూనియన్ (IPU), యూరోపియన్ పార్లమెంట్ సంయుక్తంగా ఈ సదస్సును నిర్వహిస్తున్నాయి. ఆధునిక సాంకేతిక పరిజ్ఞానంతో పార్లమెంటరీ కార్యకలాపాలను మరింత సమర్థంగా నిర్వహించే అంశాలపై చర్చించనున్నారు.

బహ్రెయిన్ ప్రతినిధి బృందానికి షూరా కౌన్సిల్ మానవ హక్కుల కమిటీ అధ్యక్షుడు అలీ హుస్సేన్ అల్ షెహాబీ నాయకత్వం వహించనున్నారు. సదస్సులో డిజిటల్ ఆవిష్కరణలు, వ్యూహాత్మక నాయకత్వం, డిజిటల్ సమాజంలో పార్లమెంటేరియన్ల పాత్ర వంటి అంశాలు ప్రధానంగా చర్చకు రానున్నాయి. శాసన ప్రక్రియలో AI వినియోగం, తప్పుడు సమాచారాన్ని అరికట్టడం, సైబర్ భద్రతను బలోపేతం చేయడం, పార్లమెంటరీ డిజిటల్ మౌలిక సదుపాయాల ఆధునికీకరణపై చర్చించనున్నారు.

అలాగే పార్లమెంటరీ సిబ్బంది కోసం ప్రత్యేక ముందస్తు కార్యక్రమాన్ని కూడా నిర్వహించనున్నారు. ఇందులో కాగిత ఆధారిత విధానాల నుంచి పూర్తిస్థాయి డిజిటల్ ప్రక్రియలకు మారడం, పారదర్శకత పెంపు, పార్లమెంటరీ కార్యకలాపాలను ఎప్పటికప్పుడు తెలుసుకునే సదుపాయం, క్లౌడ్ కంప్యూటింగ్, డేటా నిర్వహణ వంటి అంశాలపై అవగాహన కల్పించనున్నారు.