రియాద్: యుద్ధ ప్రభావంతో దెబ్బతిన్న సిరియా పునర్నిర్మాణానికి సౌదీ అరేబియా భారీ ఆర్థిక సహాయం ప్రకటించింది. సౌదీ ఫండ్ ఫర్ డెవలప్‌మెంట్ (SFD) ద్వారా $403 మిలియన్లకు పైగా విలువైన ఆరు రాయితీతో కూడిన అభివృద్ధి రుణ ఒప్పందాలపై గురువారం సంతకాలు చేసింది. విద్యుత్, తాగునీరు, వైద్యం, గృహ నిర్మాణం, మౌలిక సదుపాయాలు, డిజిటల్ పరివర్తన రంగాల్లో ఈ నిధులను వినియోగించనున్నారు.

సౌదీ క్రౌన్ ప్రిన్స్, ప్రధానమంత్రి మహమ్మద్ బిన్ సల్మాన్, సిరియా అధ్యక్షుడు అహ్మద్ అల్-షరా సమక్షంలో ఈ ఒప్పందాలు కుదిరాయి. సౌదీ రాజు సల్మాన్, క్రౌన్ ప్రిన్స్ ఆదేశాల మేరకు ఈ కార్యక్రమాన్ని చేపట్టారు. SFD చీఫ్ ఎగ్జిక్యూటివ్ ఆఫీసర్ సుల్తాన్ అల్-మర్షాద్, సిరియా ఆర్థిక మంత్రి మహమ్మద్ యిస్ర్ బర్నియే ఒప్పందాలపై సంతకాలు చేశారు. ఈ నిధులతో సిరియాలో దెబ్బతిన్న మౌలిక సదుపాయాలను పునరుద్ధరించడంతో పాటు ప్రజలకు అవసరమైన ప్రాథమిక సేవలను మెరుగుపరచనున్నారు.

విద్యుత్ రంగానికి $90 మిలియన్లు

అలెప్పో థర్మల్ పవర్ ప్లాంట్‌లో విద్యుత్ ఉత్పత్తి యూనిట్ల పునరుద్ధరణకు $90 మిలియన్లు కేటాయించారు. ఈ ప్రాజెక్టు ద్వారా సుమారు 50 లక్షల మందికి ప్రయోజనం కలగనుంది. విద్యుత్ ఉత్పత్తి సామర్థ్యాన్ని పెంచి, ప్రజలకు, ప్రభుత్వ సంస్థలకు నిరంతర విద్యుత్ సరఫరా అందించడంతో పాటు పారిశ్రామిక, ఆర్థిక కార్యకలాపాలకు ఊతమివ్వనున్నారు.

తాగునీటి కోసం 3 లక్షల స్మార్ట్ మీటర్లు

సిరియాలో తాగునీటి సరఫరా వ్యవస్థ ఆధునికీకరణకు $30 మిలియన్లు వెచ్చించనున్నారు. ఇందులో భాగంగా 3 లక్షల స్మార్ట్ వాటర్ మీటర్లను సరఫరా చేసి ఏర్పాటు చేయనున్నారు. వివిధ గవర్నరేట్లలో సుమారు 15 లక్షల మందికి దీని ద్వారా ప్రయోజనం కలగనుంది.

సివిల్ డిఫెన్స్ కేంద్రాలకు $105 మిలియన్లు

వివిధ ప్రాంతాల్లో 25 సివిల్ డిఫెన్స్ కేంద్రాల నిర్మాణం, పునరుద్ధరణ, ఆధునిక పరికరాల ఏర్పాటుకు $105 మిలియన్లు కేటాయించారు. ఈ ప్రాజెక్టుతో 70 లక్షల మందికి పైగా ప్రజలకు ప్రయోజనం కలగనుంది. అత్యవసర పరిస్థితులను ఎదుర్కోవడం, విపత్తుల నిర్వహణ, శిథిలాల తొలగింపు వంటి సేవలను మరింత బలోపేతం చేయనున్నారు.

10 వేల ఇళ్ల పునరుద్ధరణకు $60 మిలియన్లు

యుద్ధంలో దెబ్బతిన్న గృహాల పునరుద్ధరణ కోసం $60 మిలియన్ల ప్రాజెక్టును చేపట్టనున్నారు. ఇందులో భాగంగా సిరియాలోని వివిధ ప్రాంతాల్లో 10 వేల వరకు నివాస గృహాలను మరమ్మతులు చేసి వినియోగంలోకి తీసుకురానున్నారు.

వైద్య రంగానికి $100 మిలియన్లు

ఆసుపత్రులు, ఆరోగ్య కేంద్రాల నిర్మాణం, పునరుద్ధరణ, ఆధునిక వైద్య పరికరాల ఏర్పాటు కోసం $100 మిలియన్లు కేటాయించారు. ప్రత్యేక వైద్య సేవలను తిరిగి అందుబాటులోకి తీసుకురావడం, చికిత్స సౌకర్యాలను విస్తరించడం, ఇప్పటికే ఉన్న ఆసుపత్రులపై ఒత్తిడిని తగ్గించడం ఈ ప్రాజెక్టు లక్ష్యాలు.

డిజిటల్ సేవలకు $18 మిలియన్లకు పైగా

సిరియా ఆర్థిక మంత్రిత్వ శాఖలో డిజిటల్ పరివర్తన, సంస్థాగత అభివృద్ధి కోసం $18 మిలియన్లకు పైగా నిధులు కేటాయించనున్నారు. సమగ్ర డిజిటల్ వ్యవస్థను ప్రవేశపెట్టి ప్రభుత్వ ఆర్థిక సేవల్లో పారదర్శకత, సామర్థ్యాన్ని పెంచడంతో పాటు ప్రజలకు సేవలను సులభతరం చేయనున్నారు.

ఇదిలా ఉండగా, 2025 సెప్టెంబర్‌లోనూ సౌదీ అరేబియా SFD ద్వారా సిరియాకు రెండు గ్రాంట్లు అందించింది. వీటి ద్వారా ముడి చమురు సరఫరాతో పాటు ప్రభుత్వ ఉద్యోగుల మూడు నెలల వేతనాల్లో కొంత భాగాన్ని భరించేందుకు సహాయం చేసింది.