దుబాయ్: యూఏఈలో డ్రైవింగ్ లైసెన్స్ నిబంధనల్లో కీలక మార్పులు తీసుకొస్తున్నారు. గడువు ముగిసి 10 ఏళ్లకు పైగా రెన్యువల్ చేయని డ్రైవింగ్ లైసెన్స్‌లను తిరిగి పొందాలనుకునే వారు ఇకపై థియరీ, ప్రాక్టికల్ పరీక్షలు తప్పనిసరిగా రాయాల్సి ఉంటుంది. ఈ కొత్త నిబంధనలు 2027 జనవరి 1 నుంచి అమల్లోకి రానున్నాయి. 2026 నాటి క్యాబినెట్ నిర్ణయం నంబర్ 174లో ఈ మార్పులను పొందుపరిచారు. ఫెడరల్ డిక్రీ లా నంబర్ 14 ఆఫ్ 2024కు సంబంధించిన ట్రాఫిక్ నిబంధనల అమలు మార్గదర్శకాల్లో భాగంగా వీటిని రూపొందించారు.

10 ఏళ్ల తర్వాత లైసెన్స్ రెన్యువల్‌కు పరీక్షలు

కొత్త నిబంధనల్లోని ఆర్టికల్ 76 ప్రకారం డ్రైవింగ్ లైసెన్స్ గడువు ముగిసిన తేదీ నుంచి 10 ఏళ్లకు పైగా రెన్యువల్ చేయని వారు సంబంధిత లైసెన్సింగ్ అథారిటీ నిర్వహించే థియరీ, ప్రాక్టికల్ పరీక్షల్లో ఉత్తీర్ణులు కావాలి. రెన్యువల్‌కు సంబంధించిన ఇతర అర్హతలను కూడా పూర్తి చేయాల్సి ఉంటుంది. ఇక్కడ 10 ఏళ్ల కాలపరిమితి లైసెన్స్ మొదటిసారి ఎప్పుడు జారీ చేశారనే దానిపై కాకుండా, దాని గడువు ముగిసిన తేదీ నుంచి లెక్కిస్తారు.

అయితే, ఇలాంటి వారంతా కొత్తగా డ్రైవింగ్ నేర్చుకునే వారి మాదిరిగా పూర్తి శిక్షణ కోర్సు చేయాలని లేదా నిర్దిష్ట గంటలపాటు శిక్షణ తీసుకోవాలని నిబంధనలో పేర్కొనలేదు. అవసరమైన కనీస థియరీ, ప్రాక్టికల్ పరీక్షలను ఫెడరల్ ట్రాఫిక్ కౌన్సిల్ నిర్ణయించవచ్చు.

దుబాయ్‌లో ఇప్పటికే 10 ఏళ్లకు పైగా గడువు ముగిసిన లైసెన్స్‌ల రెన్యువల్‌కు రోడ్స్ అండ్ ట్రాన్స్‌పోర్ట్ అథారిటీ (RTA) మూల్యాంకన పరీక్ష నిర్వహిస్తోంది. అయితే కొత్త ఫెడరల్ నిబంధనల్లో పేర్కొన్న రెండు పరీక్షల విధానం, ప్రస్తుతం దుబాయ్‌లో ఉన్న పరీక్ష ఒకటేనని స్పష్టత లేదు.

లెర్నర్ పర్మిట్ గడువు ఆరు నెలలకు పెంపు

డ్రైవింగ్ నేర్చుకునే వారికి కూడా కొత్త నిబంధనలతో వెసులుబాటు కలగనుంది. ప్రస్తుతం ఉన్న మూడు నెలల రెన్యువబుల్ లెర్నర్ పర్మిట్ గడువును గరిష్ఠంగా ఆరు నెలలకు పెంచారు. కొత్త నిబంధనల్లోని ఆర్టికల్ 82 ప్రకారం ఈ పర్మిట్‌ను ఆరు నెలలకు మించకుండా జారీ చేయవచ్చు. అవసరమైతే మళ్లీ రెన్యువల్ చేసుకోవచ్చు.

అయితే ప్రతి ఒక్కరికీ తప్పనిసరిగా ఆరు నెలల పర్మిట్ ఇస్తారని లేదా ఇప్పటికే ఉన్న పర్మిట్ల గడువు ఆటోమేటిక్‌గా పెరుగుతుందని దీని అర్థం కాదు. డ్రైవింగ్ శిక్షణ సమయంలో వాహనంలో లెర్నర్, అర్హత కలిగిన ఇన్‌స్ట్రక్టర్ మాత్రమే ఉండాలి. వాహనాన్ని నియంత్రించగల సామర్థ్యం ఉందని ఇన్‌స్ట్రక్టర్ భావించే వరకు జనావాస ప్రాంతాల్లోని రోడ్లపై లెర్నర్లు డ్రైవింగ్ చేయకూడదు.

గతంలో 1997 నాటి మినిస్టీరియల్ రిజల్యూషన్ నంబర్ 130 ప్రకారం లెర్నర్ పర్మిట్ మూడు నెలల కాలానికి జారీ చేసేవారు. తాజా నిర్ణయంతో ఈ గరిష్ఠ గడువును ఆరు నెలలకు పెంచారు. కొత్త నిబంధనలు 2027 జనవరి 1 నుంచి అమల్లోకి రానుండటంతో యూఏఈలో డ్రైవింగ్ లైసెన్స్ రెన్యువల్ చేసుకోవాలనుకునే వారు ఈ మార్పులను గమనించాలని అధికారులు సూచిస్తున్నారు.