దుబాయ్: యూఏఈలో పిల్లల విద్యలో డిజిటల్ పరికరాలు, ఆన్‌లైన్ లెర్నింగ్ ప్లాట్‌ఫామ్‌లు, ఆర్టిఫిషియల్ ఇంటెలిజెన్స్ (AI) వినియోగం పెరుగుతోంది. అయితే ఈ మార్పుల మధ్య చిన్నారుల్లో చేతితో రాసే అలవాటు తగ్గుతోందా? వారి చేతిరాత నైపుణ్యాలు దెబ్బతింటున్నాయా? అనే ప్రశ్నలు తల్లిదండ్రులు, ఉపాధ్యాయుల్లో చర్చనీయాంశంగా మారాయి.

బ్రిటన్‌కు చెందిన నేషనల్ లిటరసీ ట్రస్ట్ 2025 వార్షిక అక్షరాస్యత సర్వేలో ఈ పరిస్థితిపై ఆందోళనకరమైన వివరాలు వెల్లడయ్యాయి. 5 నుంచి 18 ఏళ్ల వయసున్న 1,14,970 మంది పిల్లలు, యువత పాల్గొన్న ఈ సర్వే ప్రకారం.. 8 నుంచి 18 ఏళ్ల వయసున్న వారిలో కేవలం 26.6 శాతం మందే ఖాళీ సమయాల్లో రాయడాన్ని ఇష్టపడుతున్నారు. 2010తో పోలిస్తే ఈ సంఖ్య 20.2 శాతం పాయింట్లు తగ్గింది. కేవలం 10.4 శాతం మంది మాత్రమే ప్రతిరోజూ తమ ఖాళీ సమయాల్లో ఏదో ఒకటి రాస్తున్నారు. ఈ సర్వే బ్రిటన్‌లో నిర్వహించినప్పటికీ, డిజిటల్ పరికరాల వినియోగం వేగంగా పెరుగుతున్న యూఏఈ విద్యావ్యవస్థలోనూ ఇలాంటి పరిస్థితులు తలెత్తే అవకాశాలపై చర్చ మొదలైంది.

చేతిరాత అంటే కేవలం అక్షరాలు రాయడం కాదు

నార్డ్ ఆంగ్లియా ఇంటర్నేషనల్ స్కూల్ అబుదాబి ప్రైమరీ విభాగం డిప్యూటీ హెడ్ లియా అట్కిన్స్ అభిప్రాయం ప్రకారం.. సాంకేతిక పరిజ్ఞానాన్ని స్వాగతిస్తూనే పిల్లల్లో ప్రాథమిక రాత నైపుణ్యాలను కాపాడుకోవాల్సిన బాధ్యత పాఠశాలలపై ఉంది. చేతిరాత అభివృద్ధిలో చేతి వేళ్ల కదలికలు, కండరాల నియంత్రణ, ఏకాగ్రత, ఓర్పు వంటి అనేక అంశాలు కీలకంగా ఉంటాయని ఆమె వివరించారు. ఇవి ఒక్కరోజులో అలవడవని, ప్రాథమిక విద్య దశ నుంచే క్రమంగా సాధన చేయించాలని సూచించారు.

తమ పాఠశాలలో చిన్నారుల దశ నుంచే వేళ్ల వ్యాయామాలు, వస్తువులను పట్టుకోవడం, గీతలు గీయడం వంటి కార్యకలాపాల ద్వారా రాతకు అవసరమైన నైపుణ్యాలను అభివృద్ధి చేస్తున్నట్లు తెలిపారు. ప్రైమరీ విద్యలోనూ ఇంగ్లిష్‌తో పాటు ఇతర సబ్జెక్టుల్లో చేతితో రాసే అవకాశాలు కల్పిస్తున్నట్లు చెప్పారు. పిల్లలు పై తరగతులకు వెళ్లే కొద్దీ వేగంగా, స్పష్టంగా రాయడం, ఎక్కువ సమయం పాటు రాయగలగడం, తమ ఆలోచనలను సమర్థంగా వ్యక్తీకరించడం వంటి అంశాలపై దృష్టి పెడుతున్నట్లు వెల్లడించారు.

ఏఐ కాలంలో సొంతంగా రాయడం మరింత ముఖ్యం

ఏఐ ద్వారా వ్యాసాలు, సమాధానాలు రూపొందించుకునే సౌకర్యాలు పెరుగుతున్న నేపథ్యంలో పిల్లలు స్వయంగా ఆలోచించి రాయగలిగే సామర్థ్యాన్ని పెంపొందించుకోవడం మరింత అవసరమని విద్యావేత్తలు చెబుతున్నారు.

నార్డ్ ఆంగ్లియా ఇంటర్నేషనల్ స్కూల్ అబుదాబి డిప్యూటీ హెడ్ ఓలా లానియాన్ మాట్లాడుతూ.. తమ పాఠశాలలో ఐదో తరగతి (Year 5) నుంచి మాత్రమే రోజువారీ విద్యా కార్యకలాపాల కోసం ల్యాప్‌టాప్‌ల వినియోగాన్ని ప్రారంభిస్తున్నట్లు తెలిపారు.

అప్పటివరకు పిల్లలు ప్రాథమిక రాత నైపుణ్యాలను అలవర్చుకునేలా చూస్తున్నామని, ఆ తర్వాత కూడా ముఖ్యంగా ఇంగ్లిష్ పాఠాల్లో పెన్‌, పేపర్‌కే ప్రాధాన్యం ఇస్తున్నామని చెప్పారు. పిల్లలు తమ రచనలను స్వయంగా ప్రణాళిక చేసుకోవడం, రాయడం, సవరించడం, స్పెల్లింగ్‌ను గుర్తుంచుకుని రాయడం వంటి సాధన చేస్తున్నట్లు వివరించారు.

కొంతమంది పిల్లల్లో రాసే సామర్థ్యం తగ్గుతోంది

దుబాయ్‌లోని స్విస్ ఇంటర్నేషనల్ సైంటిఫిక్ స్కూల్ పీవైపీ కోఆర్డినేటర్ కేథరిన్ కెల్లీ మాట్లాడుతూ.. డిజిటల్ పరికరాల వినియోగం పెరుగుతున్న కొద్దీ కొంతమంది పిల్లల్లో చేతిరాత వేగం, ఎక్కువ సమయం పాటు రాయగలిగే సామర్థ్యం తగ్గుతున్నట్లు గుర్తించామని తెలిపారు. చేతిరాత వల్ల జ్ఞాపకశక్తి, ఏకాగ్రత, అక్షరాస్యత అభివృద్ధికి సంబంధించిన మానసిక ప్రక్రియలకు మద్దతు లభిస్తుందని చెప్పారు. అందువల్ల డిజిటల్ విద్యను ప్రోత్సహిస్తూనే చేతిరాత సాధనకు తగిన ప్రాధాన్యం ఇవ్వాలని సూచించారు.

పరీక్షల్లో ఎక్కువసేపు రాయడమే అసలు సవాల్

అయితే పిల్లల్లో చేతిరాత నైపుణ్యాలు పూర్తిగా తగ్గిపోతున్నాయని అందరూ భావించడం లేదు. మారింది రాయగలిగే సామర్థ్యం కాదని, రోజువారీ జీవితంలో చేతితో ఎక్కువసేపు రాయాల్సిన అవసరం తగ్గడమేనని కొందరు విద్యావేత్తలు అభిప్రాయపడుతున్నారు.

దుబాయ్‌లోని జెమ్స్ ఫస్ట్‌పాయింట్ స్కూల్ ప్రిన్సిపల్, సీఈఓ రెబెక్కా క్రీన్ మాట్లాడుతూ.. పిల్లలు ఇప్పటికీ అక్షరాలు రాయడం, స్పెల్లింగ్ నేర్చుకోవడం, స్పష్టంగా రాయడం కొనసాగిస్తున్నారని తెలిపారు. అయితే పాఠశాల బయట ఎక్కువసేపు చేతితో రాయాల్సిన సందర్భాలు తగ్గిపోయాయని చెప్పారు.

ముఖ్యంగా జీసీఎస్ఈ (GCSE), ఏ-లెవల్ (A-Level) పరీక్షల్లో విద్యార్థులు రెండు గంటలు లేదా అంతకంటే ఎక్కువ సమయం పాటు వేగంగా, స్పష్టంగా రాయాల్సి ఉంటుందని గుర్తుచేశారు. అందువల్ల రాత వేగం, ఓర్పు పెంపొందించుకోవడం ముఖ్యమన్నారు.

స్పెల్లింగ్, వాక్య నిర్మాణం, పదజాలం, వాదనలను రూపొందించడం వంటి ప్రాథమిక నైపుణ్యాలను నేర్చుకునే సమయంలో విద్యార్థులు ముందుగా సొంతంగా ఆలోచించి రాయాలని సూచించారు. ఈ దశలో చేతిరాత సాధన ఉపయోగకరంగా ఉంటుందని వివరించారు.

తల్లిదండ్రుల్లోనూ ఆందోళన

యూఏఈలో నివసిస్తున్న కొంతమంది ప్రవాస తల్లిదండ్రులు కూడా తమ పిల్లల చేతిరాతపై ఆందోళన వ్యక్తం చేస్తున్నారు. 

మోల్డోవాకు చెందిన అలెగ్జాండ్రా రుసు మాట్లాడుతూ.. తన కుమారుడికి చేతిరాతలో పెద్దగా ఇబ్బంది లేకపోయినా, అక్షరాల పొందిక, రాత నాణ్యత తన చిన్ననాటి రోజులతో పోలిస్తే తక్కువగా ఉన్నాయని తెలిపారు. చిన్నప్పుడు చేతిరాత మెరుగుపడుతుందని భావించి కర్సివ్ రైటింగ్ పుస్తకాలు కూడా కొనిచ్చినట్లు చెప్పారు.

భారతీయ ప్రవాసి దేవయాని ప్రసాద్ కూడా ఇలాంటి అభిప్రాయాన్ని వ్యక్తం చేశారు. తన పిల్లలు ఫోన్‌, ల్యాప్‌టాప్‌లపై వేగంగా టైప్ చేయగలుగుతున్నప్పటికీ, చేతితో రాసేటప్పుడు వేగం, అక్షరాల నిర్మాణం, తమ ఆలోచనలను కాగితంపై వ్యక్తీకరించే సామర్థ్యం తగ్గినట్లు గుర్తించానని చెప్పారు. డిజిటల్ పరికరాలు, ఏఐపై అధికంగా ఆధారపడటం వల్ల పిల్లల్లో ఓపిక, సాధన చేయాలనే ఆసక్తి కూడా తగ్గే ప్రమాదం ఉందని ఆమె ఆందోళన వ్యక్తం చేశారు.