హైదరాబాద్: హైదరాబాద్ లో దీపావళి పండుగ వేళ బాణసంచా విక్రయాలు జరిపే వ్యాపారులకు గ్రేటర్ హైదరాబాద్ మ్యానిసిపల్ కార్పొరేషన్ (GHMC) కీలక ఆదేశాలు జారీ చేసింది. 2026-27 ఆర్థిక సంవత్సరానికి సంబంధించి తాత్కాలిక టపాసుల దుకాణాల లైసెన్స్ ఫీజును 10 శాతం పెంచుతున్నట్లు అధికారులు ప్రకటించారు.

తాజా పెంపుతో రిటైల్ వ్యాపారులకు లైసెన్స్ ఫీజు రూ.13,310గా ఉండగా, హోల్‌సేల్ వ్యాపారులకు ఈ రుసుము రూ.79,860గా ఖరారు చేశారు. ఈ వ్యాపారం నిర్వహించాలనుకునే నిర్వాహకులు ముందుగా జీహెచ్‌ఎంసీ అధికారిక వెబ్‌సైట్ ద్వారా లేదా మీ-సేవ కేంద్రాల ద్వారా తప్పనిసరిగా ‘TIN’ (Taxpayer Identification Number) పొందాల్సి ఉంటుంది. అనుమతి లేని ప్రాంతాల్లో లేదా నిబంధనలకు విరుద్ధంగా దుకాణాలు ఏర్పాటు చేస్తే కఠిన చర్యలు ఉంటాయని అధికారులు హెచ్చరించారు.

GHMC: భద్రతా ప్రమాదాలు మరియు తనిఖీలు
ప్రతి టపాసుల దుకాణంలోనూ అగ్నిప్రమాదాలను నివారించేందుకు తగినన్ని అగ్నిమాపక పరికరాలు (Fire Extinguishers) అందుబాటులో ఉంచడం తప్పనిసరి. దుకాణాల వద్ద ఎలాంటి అవాంఛనీయ ప్రమాదాలు జరిగినా, వాటికి పూర్తి బాధ్యత నిర్వాహకులదేనని జీహెచ్‌ఎంసీ స్పష్టం చేసింది. నిబంధనలు సక్రమంగా అమలవుతున్నాయా లేదా అని పర్యవేక్షించేందుకు ప్రత్యేక తనిఖీ బృందాలను రంగంలోకి దించుతున్నట్లు అధికారులు వెల్లడించారు.