న్యూయార్క్: ప్రపంచవ్యాప్తంగా ఘర్షణలను నివారించడం, వివాదాలను పరిష్కరించడం, శాంతి స్థాపనలో ఐక్యరాజ్యసమితి (యూఎన్ఓ) ప్రత్యేక రాజకీయ మిషన్ల పాత్ర ఎంతో కీలకమని కువైట్ స్పష్టం చేసింది. ఐరాస జనరల్ అసెంబ్లీలోని నాలుగో కమిటీ సమావేశంలో కువైట్ తరఫున దౌత్య అధికారి మొహమ్మద్ అల్ ముల్లా ఈ వ్యాఖ్యలు చేశారు. ప్రత్యేక రాజకీయ మిషన్ల సమగ్ర సమీక్షపై జరిగిన చర్చలో ఆయన మాట్లాడారు. ఈ మిషన్ల విజయాన్ని అవి ఎంతకాలం కొనసాగుతున్నాయనే అంశంతో కాకుండా, వివాదాలకు మూలకారణాలను పరిష్కరించి, చర్చలకు అనుకూల పరిస్థితులు కల్పించి, శాశ్వత రాజకీయ పరిష్కారాలను సాధించగలుగుతున్నాయా అనే దానిపై అంచనా వేయాలని అల్ ముల్లా అన్నారు.

మారుతున్న అంతర్జాతీయ పరిస్థితులకు అనుగుణంగా యూఎన్ఓ శాంతి కార్యకలాపాలను మరింత సమర్థవంతంగా తీర్చిదిద్దేందుకు చేపడుతున్న ప్రయత్నాలను ఆయన స్వాగతించారు. మిషన్లకు స్పష్టమైన, ఆచరణ సాధ్యమైన లక్ష్యాలు ఉండాలని, క్షేత్రస్థాయిలో పరిస్థితులకు అనుగుణంగా వాటి విధులు మారేలా వెసులుబాటు కల్పించాలని సూచించారు. అదే సమయంలో దేశాల సార్వభౌమాధికారం, రాజకీయ స్వాతంత్ర్యం, ప్రాదేశిక సమగ్రతను గౌరవించాలని పేర్కొన్నారు. ఈ మిషన్లకు తగిన ఆర్థిక, మానవ వనరులతో పాటు రాజకీయ మద్దతు అందించాలని కువైట్ కోరింది. 

మిడిలీస్ట్ పరిస్థితులపై స్పందిస్తూ, పాలస్తీనా సమస్యకు న్యాయమైన, సమగ్ర పరిష్కారం సాధించడంలో ఐరాస మధ్యప్రాచ్య శాంతి ప్రక్రియ ప్రత్యేక సమన్వయకర్త కార్యాలయంతో పాటు ఐరాస ప్రత్యేక ప్రతినిధులు, రాజకీయ కార్యాలయాలు కీలక పాత్ర పోషిస్తున్నాయని అల్ ముల్లా అన్నారు. అయితే ఈ ప్రయత్నాలు విజయవంతం కావాలంటే పాలస్తీనా భూభాగాలపై ఇజ్రాయెల్ ఆక్రమణకు ముగింపు పలకాలని స్పష్టం చేశారు. 

పాలస్తీనా ప్రజల స్వయంపాలన హక్కుతో పాటు స్వతంత్ర, సార్వభౌమ దేశం ఏర్పాటు కావాలని పేర్కొన్నారు. 1967 జూన్ 4 నాటి సరిహద్దుల ప్రకారం, తూర్పు జెరూసలెం రాజధానిగా పాలస్తీనా దేశం ఏర్పడాలని, ఇది సంబంధిత అంతర్జాతీయ తీర్మానాలకు అనుగుణంగా ఉండాలని కువైట్ అభిప్రాయపడింది.