అబుదాబి హోటల్‌లో ఘర్షణ కేసు.. 8 మంది నిందితులకు ఊరట..!!

- November 17, 2026 , by Maagulf
అబుదాబి హోటల్‌లో ఘర్షణ కేసు.. 8 మంది నిందితులకు ఊరట..!!

అబుదాబి: యూఏఈలోని అబుదాబిలో ఓ హోటల్‌లో జరిగిన ఘర్షణ కేసులో ఎనిమిది మంది నిందితులకు ఊరట లభించింది. బాధితుడు క్షమాభిక్ష కోరడంతో పాటు ఇరువర్గాల మధ్య రాజీ కుదరడం, ఫిర్యాదులను ఉపసంహరించుకోవడంతో అప్పీల్ అనంతరం కోర్టు వారి శిక్షలను తగ్గించింది. ఒక్కొక్కరికి విధించిన జరిమానాను Dh300,000 నుంచి Dh150,000కు తగ్గించింది. 

అబుదాబి జ్యుడీషియల్ డిపార్ట్‌మెంట్ తెలిపిన వివరాల ప్రకారం.. నిందితులను విడుదల చేయాలని కోరుతూ బాధితుడు అబుదాబి ప్రభుత్వానికి విజ్ఞప్తి చేశారు. ఇరువర్గాల మధ్య సయోధ్య కుదరడం, కేసుకు సంబంధించిన ఫిర్యాదులను ఉపసంహరించుకోవడం వంటి అంశాలను పరిగణనలోకి తీసుకుని కోర్టు ఈ నిర్ణయం తీసుకుంది.

మొదట 10 మందికి శిక్షలు

నవంబర్ 13న అబుదాబి క్రిమినల్ కోర్టు హోటల్‌లో జరిగిన సామూహిక ఘర్షణ కేసులో మొత్తం 10 మందిని దోషులుగా నిర్ధారించింది. వారిలో ఆరుగురికి ఆరు నెలల జైలు శిక్షతో పాటు ఒక్కొక్కరికి Dh300,000 జరిమానా విధించింది. జైలు శిక్ష పూర్తయిన తర్వాత వారిని దేశం నుంచి బహిష్కరించాలని కూడా ఆదేశించింది. మరో ఇద్దరికి కూడా ఆరు నెలల జైలు శిక్ష, ఒక్కొక్కరికి Dh300,000 జరిమానా విధించింది. ఘర్షణకు సంబంధించిన వీడియోలను సమాచార సాంకేతిక పరిజ్ఞానాన్ని ఉపయోగించి చిత్రీకరించి, ప్రచురించడం ద్వారా వ్యక్తిగత గోప్యతకు భంగం కలిగించినట్లు కోర్టు నిర్ధారించింది. జైలు శిక్ష అనంతరం వారిని కూడా దేశం నుంచి బహిష్కరించాలని ఆదేశించింది.

వైరల్ వీడియోతో వెలుగులోకి వచ్చిన ఘటన

UFC ఫైటర్ మెరాబ్ దవాలిష్విలి, ఉస్మాన్ నూర్మగోమెడోవ్ మధ్య ఘర్షణ జరుగుతున్నట్లు చూపించే వీడియో సోషల్ మీడియాలో వైరల్ కావడంతో ఈ ఘటన వెలుగులోకి వచ్చింది. ఈ వీడియో ఆధారంగా పోలీసులు దర్యాప్తు చేపట్టి నిందితులను అరెస్టు చేశారు. అయితే, హోటల్‌లో జరిగిన ఈ ఘర్షణకు UFC ఫైటర్లకు ప్రత్యక్ష సంబంధం ఉందని అబుదాబి అధికారులు అధికారికంగా ప్రకటించలేదు.

Click/tap here to subscribe to MAAGULF news alerts on Telegram

తాజా వార్తలు

- మరిన్ని వార్తలు

Copyrights 2015 | MaaGulf.com