అబుదాబీ ఇంటర్నేషనల్ బోట్ షో 2026కు భారీ స్పందన..

- November 20, 2026 , by Maagulf
అబుదాబీ ఇంటర్నేషనల్ బోట్ షో 2026కు భారీ స్పందన..

అబుదాబీ: అబుదాబీలో నిర్వహిస్తున్న ఎనిమిదో ఎడిషన్ అబుదాబీ ఇంటర్నేషనల్ బోట్ షో (ADIBS) 2026కు తొలిరోజే సందర్శకుల నుంచి విశేష స్పందన లభించింది. కొత్త ఉత్పత్తుల ఆవిష్కరణలు, వాణిజ్య ఒప్పందాలు, సముద్రయాన అనుభవాలు, వినోద కార్యక్రమాలతో ప్రదర్శన సందడిగా ప్రారంభమైంది.

అల్ ధఫ్రా ప్రాంత పాలక ప్రతినిధి హిస్ హైనెస్ షేక్ హమ్దాన్ బిన్ జాయెద్ అల్ నహ్యాన్ ఆశీస్సులతో ఈ ప్రదర్శన జరుగుతోంది. నవంబర్ 19 నుంచి 22 వరకు ADNEC మెరీనా హాల్‌లో నిర్వహిస్తున్న ఈ ఎనిమిదో ఎడిషన్ ఇప్పటివరకు జరిగిన ప్రదర్శనల్లోనే అతిపెద్దదిగా నిలిచింది.

ADNEC గ్రూప్ ఆధ్వర్యంలో నిర్వహిస్తున్న ఈ ప్రదర్శనలో 57 దేశాలకు చెందిన 1,210 ఎగ్జిబిటర్లు, బ్రాండ్లు పాల్గొంటున్నాయి. 96,000 చదరపు మీటర్లకు పైగా విస్తీర్ణంలో ఏర్పాటు చేసిన ఈ ప్రదర్శనలో మెరీనా ప్రాంతంలో 168 బోట్లు సందర్శకులను ఆకట్టుకుంటున్నాయి.

అంతర్జాతీయ స్థాయి ఉత్పత్తుల ఆవిష్కరణలు

బోట్ తయారీ సంస్థలు, మెరైన్ కంపెనీలు, కొనుగోలుదారులు, పరిశ్రమ నిపుణులు, సముద్రయాన ప్రియులకు ఈ ప్రదర్శన అంతర్జాతీయ వేదికగా నిలుస్తోంది. క్యాటమరాన్లు, ఫిషింగ్ బోట్లు, లీజర్ బోట్లు, హౌస్‌బోట్లతో పాటు పలు రకాల నౌకలను ప్రముఖ మెరైన్ బ్రాండ్లు ఆవిష్కరించాయి. వీటిలో కొన్ని ఉత్పత్తులను తొలిసారిగా మధ్యప్రాచ్య మార్కెట్‌కు పరిచయం చేశారు.

ప్రదర్శనలో ప్రముఖ స్పాన్సర్, ఎగ్జిబిటర్ అయిన డెల్మా మెరైన్‌కు సంబంధించిన పలు అవగాహన ఒప్పందాలు కూడా కుదిరాయి.

మారా మెరైన్ ట్రేడింగ్ సంస్థ 'మారా వేవ్స్' పేరుతో బోట్లు, యాచ్‌ల కోసం ప్రత్యేకంగా రూపొందించిన ప్రీమియం మెరైన్ సీటింగ్ సొల్యూషన్‌ను పరిచయం చేసింది. అలాగే బోట్లను సులభంగా పైకి ఎత్తేందుకు, నిర్వహణ సామర్థ్యాన్ని మెరుగుపరిచేందుకు రూపొందించిన 'మారా మెరైన్ బోట్ లిఫ్టర్'ను ఆవిష్కరించింది.

అబుదాబీని అంతర్జాతీయ మెరైన్ హబ్‌గా తీర్చిదిద్దే ప్రయత్నాలు

ప్రదర్శనలో భాగంగా ఏర్పాటు చేసిన నాలెడ్జ్ బాక్స్ వేదికపై సముద్ర రవాణా రంగంలో వస్తున్న మార్పులు, భవిష్యత్ అభివృద్ధిపై చర్చలు నిర్వహించారు. 'షేపింగ్ లైఫ్ ఆన్ ది వాటర్: ది రెగ్యులేషన్స్ డ్రైవింగ్ అబుదాబీస్ మారిటైమ్ ఫ్యూచర్' అనే అంశంపై ప్రత్యేక చర్చ జరిగింది.

ఈ సమావేశంలో అబుదాబీ మారిటైమ్, ఇంటిగ్రేటెడ్ ట్రాన్స్‌పోర్ట్ సెంటర్‌కు చెందిన స్ట్రాటజిక్ ఇంటర్‌ఫేస్ డైరెక్టర్ డాక్టర్ హయా అల్ దఘ్లాస్, అబుదాబీ మారిటైమ్‌లో మారిటైమ్ హబ్ అబుదాబీ మేనేజర్ ఖౌలా అల్ షెహీ పాల్గొన్నారు.

అబుదాబీ జలమార్గాల భద్రత, అందుబాటు, ఆకర్షణీయతను పెంచడంతో పాటు వ్యాపార అవకాశాలు, పెట్టుబడులు, అంతర్జాతీయ సహకారాన్ని ప్రోత్సహించడం ద్వారా ప్రపంచస్థాయి మెరైన్ హబ్‌గా అభివృద్ధి చెందేందుకు చేపడుతున్న చర్యలను వారు వివరించారు.

మారిటైమ్ హబ్ అబుదాబీ, మసాదర్ సస్టైనబిలిటీ ప్లాట్‌ఫామ్, స్వయంచాలక నౌకల కోసం కొత్త నియంత్రణ విధానాలు, ఆర్టిఫిషియల్ ఇంటెలిజెన్స్ ఆధారిత సాంకేతికతలు, వాటర్‌వేస్ మానిటరింగ్ అండ్ కంట్రోల్ సెంటర్ వంటి స్మార్ట్ మౌలిక సదుపాయాల గురించి వివరించారు.

కుటుంబ సభ్యులకు ప్రత్యేక వినోద కార్యక్రమాలు

వాణిజ్య ప్రదర్శనతో పాటు కుటుంబ సభ్యులు, బోటింగ్ ప్రియులు, చిన్నారుల కోసం పలు వినోద కార్యక్రమాలను కూడా ఏర్పాటు చేశారు. నావిగేషన్ హబ్‌లో హైస్పీడ్ రిజిడ్ ఇన్‌ఫ్లేటబుల్ బోట్ ప్రయాణాలు, వాటర్ ట్యాక్సీ ద్వారా అందమైన జలమార్గాల సందర్శన వంటి అనుభవాలను అందిస్తున్నారు.

సీ ట్రయల్ జోన్‌లో వివిధ బోట్లను ప్రత్యక్షంగా పరిశీలించడంతో పాటు నీటిపై వాటి పనితీరును పరీక్షించే అవకాశం కల్పించారు.

ADNEC మెరీనా హాల్, పరిసర జలతీర ప్రాంతాల్లో రివేరా థీమ్ ప్రదర్శనలు, స్టిల్ట్ వాకర్స్, లైవ్ మ్యూజిక్, సంప్రదాయ అల్ అయాలా నృత్య ప్రదర్శనలు సందర్శకులను అలరించాయి. తొలిరోజు ముగింపులో బాణసంచా ప్రదర్శన ప్రత్యేక ఆకర్షణగా నిలిచింది.

కొత్త ఆకర్షణలతో 2026 ఎడిషన్

ఈ ఏడాది ప్రదర్శనలో బోటర్స్ మార్కెట్, లైఫ్‌స్టైల్ అండ్ వెల్‌నెస్ జోన్, అవుట్‌డోర్ లివింగ్ జోన్ వంటి కొత్త విభాగాలను పరిచయం చేశారు. ట్రెజర్ హంట్ కార్యక్రమంతో పాటు సముద్రయాన వారసత్వాన్ని తెలియజేసే ప్రత్యేక అనుభవాలను కూడా ఏర్పాటు చేశారు.

అవుట్‌డోర్ లివింగ్ విభాగంలో రిక్రియేషనల్ వెహికల్స్, అవుట్‌డోర్ ఫర్నిచర్, షేడ్ సొల్యూషన్స్, బార్బెక్యూ పరికరాలు, అవుట్‌డోర్ కిచెన్లు, రిఫ్రిజరేషన్ ఉత్పత్తులు, వంట సామగ్రి వంటి అనేక ఉత్పత్తులను ప్రదర్శిస్తున్నారు.

నవంబర్ 22 వరకు ADNEC మెరీనా హాల్‌లో అబుదాబీ ఇంటర్నేషనల్ బోట్ షో 2026 కొనసాగనుంది. అంతర్జాతీయ మెరైన్ పరిశ్రమకు వ్యాపార, పెట్టుబడి, సాంకేతిక ఆవిష్కరణల వేదికగా ఈ ప్రదర్శన నిలుస్తోంది.

Click/tap here to subscribe to MAAGULF news alerts on Telegram

తాజా వార్తలు

- మరిన్ని వార్తలు

Copyrights 2015 | MaaGulf.com