ప్రధాన మంత్రి నరేంద్రమోదీ పుట్టినరోజు సందర్భంగా ఇప్పటికే మూడు గిన్నిస్‌ బుక్‌ రికార్డులు, ఒక జాతీయ రికార్డు నెలకొల్పేందుకు నిర్వాహకులు ప్రయత్నిస్తున్నారు. ఇప్పుడు తాజాగా మోదీ కోసం రూపొందిస్తున్న పుట్టిన రోజు కేక్‌ సైతం ప్రపంచ రికార్డు సృష్టించనుంది. గుజరాత్‌లోని నౌసారిలో ప్రధాని నరేంద్రమోదీ శనివారం తన 66వ జన్మదిన వేడుకలు జరుపుకోనున్నారు. ఈ నేపథ్యంలో సూరత్‌కు చెందిన ఓ బేకరీ స్థానిక స్వచ్ఛంద సంస్థతో కలిసి భారీ కేక్‌ను రూపొందించి గిన్నిస్‌ రికార్డు సృష్టించాలని ప్రయత్నిస్తోంది.
ఎనిమిది అడుగుల ఎత్తైన పిరమిడ్‌ ఆకారంలో నిర్వాహకులు కేక్‌ను రూపొందిచనున్నారు.ఇప్పటి వరకు పోలాండ్‌లోని ఎమ్‌టీఆర్‌ జెస్‌జో అంతర్జాతీయ ప్రదర్శనలో ఏర్పాటు చేసిన ఆరు అడుగుల ఎత్తు, 720.8 కిలోల బరువైన కేక్‌పై ఈ రికార్డు ఉంది. ఇప్పుడు దాన్ని అధిగమించాలని వారు భావిస్తున్నారు. మోదీ పుట్టినరోజు సందర్భంగా ఎనిమిది అడుగుల ఎత్తు, 12 అడుగుల పొడవు, రెండు నుంచి 2.5 టన్నుల బరువు ఉండే అతి పెద్ద కేక్‌ను తయారు చేయనున్నారు. అతుల్‌ బేకరీకి చెందిన 20 మంది నలభీములు దీన్ని తయారు చేయనున్నారు.

నౌసారిలో 11,223 మంది దివ్యాంగులకు వివిధ సహాయ పరికరాలను ప్రదానం చేయనున్న సంగతి తెలిసిందే.