సోమాలియాలో కెన్యా సరిహద్దులో ఉగ్రదాడి జరిగింది. సైనిక సిబ్బందిని లక్ష్యంగా చేసుకుని ఉగ్రవాదులు దాడి చేశారు. ఈ ఘటనలో ఏడుగురు జవాన్లు మృతిచెందగా.. పలువురు గాయపడ్డారు. సోమాలియాకి చెందిన ఉగ్ర సంస్థ అల్‌ షబాబ్‌ ఈ దాడికి పాల్పడినట్లు అధికారులు తెలిపారు.
మరోవైపు ఈ విషయాన్ని అల్‌ షబాబ్‌ కూడా ధ్రువీకరించింది. ఐదు మిలిటరీ వాహనాలపై దాడి చేసి, పలువురిని చంపేశామని ఉగ్రవాద సంస్థ మిలిటరీ ఆపరేషన్స్‌ ప్రతినిధి షేక్‌ అబు ముసాబ్‌ ప్రకటించాడు. సోమాలియా ప్రభుత్వానికి వ్యతిరేకంగా ఈ ప్రాంతంలోని భద్రతాసిబ్బందిపై అల్‌ షబాబ్‌ ఉగ్రవాదులు తరచుగా దాడులకు పాల్పడతారని స్థానికులు చెబుతున్నారు.