మస్కట్‌: గత నెలలో ముట్రా గోల్డ్‌ సౌక్‌లోని జ్యుయెలరీ స్టోర్‌లో జరిగిన భారీ దొంగతనం అనంతరం పోలీసులు అప్రమత్తమయ్యారు. ఓ గ్యాంగ్‌ భారీ మొత్తంలో గోల్డ్‌ని దోచుకుని, దేశం నుంచి పారిపోయేందుకు ప్రయత్నించింది. దాంతో, రాయల్‌ ఒమన్‌ పోలీసులు పకడ్బందీ వ్యూహం రచించారు. మొత్తం అన్ని రవాణా మార్గాల్లోనూ భద్రతను కట్టుదిట్టం చేశారు. మొత్తం 37 కిలోల బంగారంతో నిందితులు దేశం నుంచి బయటకు వెళ్ళేందుకు ప్రయత్నించారు. ఈ క్రమంలో పోలీసులు ఇప్పటిదాకా ఆరుగుర్ని అదుపులోకి తీసుకున్నారు. మరో ముగ్గురి కోసం పోలీసులు ఇంటర్‌పోల్‌ని ఆశ్రయించడం జరిగింది. గ్యాంగ్‌లో అందరూ ఆసియాకి చెందిన వ్యక్తులుగా పోలీసులు ఓ నిర్ధారణకు వచ్చారు. ఇద్దరు వ్యక్తులు విమానాశ్రయం ద్వారా విదేశాలకు పారిపోయేందుకు ప్రయత్నిస్తుండగా, వారిని ట్రాక్‌ చేసిన పోలీసులు చాకచక్యంగా నిందితుల్ని అరెస్ట్‌ చేశారు. ఇంకో వైపున సముద్ర మార్గంగా పారిపోయేందుకు ప్రయత్నించినవారినీ పక్కా వ్యూహంతో అదుపులోకి తీసుకున్నారు.