అబుదాబీ: అబుదాబీలో అధికారులు 188 వాహనాల్ని స్వాధీనం చేసుకున్నారు. పార్కింగ్‌ లాట్స్‌లో నిర్లక్ష్యంగా వదిలేసిన ఈ వాహనాల్ని స్వాధీనం చేసుకున్న అధికారులు, ఇప్పటికే 175 వార్నింగ్స్‌ కూడా వాహన యజమానులకు పంపించారు. గత నెలలో ప్రారంభించిన క్యాంపెయిన్‌లో భాగంగా ఈ చర్యలు తీసుకున్నారు. పబ్లిక్‌ ప్రాంతాల్లో నిర్లక్ష్యంగా వాహనాల్ని వదిలివేయరాదనీ, అలా వదిలేస్తే దుమ్ముపట్టిన వాహనాలతో నగరం అపరిశుభ్రంగా కనిపిస్తుందని గత కొన్నాళ్ళుగా వాహనదారుల్ని ఎడ్యుకేట్‌ చేస్తూ వచ్చారు. అయితే కొందరు అధికారుల సూచనల్ని, హెచ్చరికల్ని లెక్క చేయని కారణంగా ఆయా వాహనాల్ని అధికారులు స్వాధీనం చేసుకోవడం జరిగింది. వార్నింగ్‌ లెటర్స్‌ పంపిన తర్వాత మూడు రోజుల్లోగా సంబంధిత వాహనాల యజమానులు స్పందించకపోతే, ఆ వాహనాలు టౌల్‌ చేయబడతాయి. అల్‌ వత్‌బా ఇంపౌండింగ్‌ యార్డ్‌కి ఆ వాహనాల్ని తరలించి, చట్ట పరమైన చర్యల్ని వాహనదారులపై తీసుకోవం జరుగుతుంది.