బాలీవుడ్‌ మెగాస్టార్‌ అమితాబ్‌ బచ్చన్‌ సైనికుల కోసం పాట పాడనున్నారు. ఇటీవల ఉరీలో ఉగ్రవాదులు జరిపిన దాడిలో అమరులైన సైనికులకు ఈ పాటను అంకితం చేయనున్నారు. సైనికుల కోసం అమితాబ్‌ను పాట పాడమని కోరినట్లు బీజేపీ ఎంపీ తరుణ్‌ విజయ్‌ తన ఫేస్‌బుక్‌ ఖాతా ద్వారా తెలిపారు. 'అమితాబ్‌ బచ్చన్‌ను కలిశాను. మన నిజమైన జాతీయ హీరోను కలిసినందుకు చాలా ఆనందంగా ఉంది. ఆయన హనుమాన్‌ చాలీసా, కేదార్‌నాథ్‌ అర్చనతోపాటు సిద్ధి వినాయక్‌ హారతిని ఆలపించారు. సైనిక వీరుల కోసం కూడా తన స్వరం అందించమని కోరాము' అని తరుణ్‌ విజయ్‌ పోస్ట్‌ చేశారు. బిగ్‌ బి ఈ ఏడాది ప్రారంభంలో ఇండియా-పాకిస్థాన్‌ టీ-20 ప్రపంచ కప్‌ సమయంలో జాతీయగీతం పాడిన సంగతి తెలిసిందే.