జేమ్స్ బాండ్ స్టంట్‌మాన్, మాజీ ఎస్ఏఎస్ హీరో స్టీవ్ ట్రుగ్లియా గురువారం దుర్మరణంపాలయ్యారు. 300 అడుగుల ఎత్తులో ప్రయాణిస్తున్న హెలికాప్టర్‌ నుంచి స్టంట్ చేస్తూ దూకడంతో ఈ ప్రమాదం జరిగింది. తూర్పు లండన్‌కు చెందిన 54 ఏళ్ళ ట్రుగ్లియా నైరుతి చైనాలోని చోంగ్‌కింగ్‌లో చేసిన స్టంట్ ఆయన మరణానికి కారణమైంది. ట్రుగ్లియాకు ప్యారాచూటింగ్‌, పర్వతారోహణలో అనేక పురస్కారాలు లభించాయి. 100 మీటర్ల అబ్‌సీల్ స్టంట్‌ను అత్యంత వేగంగా చేసి ప్రపంచ రికార్డు సృష్టించారు. స్టంట్స్ చేయడం ప్రపంచంలో అత్యుత్తమ పని అని ఆయన అంటూ ఉండేవారు. 'టుమారో నెవర్ డైస్', 'వరల్డ్ ఈజ్ నాట్ ఇనఫ్' వంటి జేమ్స్ బాండ్ చిత్రాల్లోనూ, 'సేవింగ్ ప్రైవేట్ రియాన్' అనే హాలీవుడ్ క్లాసిక్స్‌లోనూ ఆయన నటించారు. ఇటీవల బెంగళూరులో కన్నడ సినిమా షూటింగ్‌లో క్లైమాక్స్ చిత్రీకరణ సమయంలో ఇటువంటి ఘటనే జరిగి, ఇద్దరు నటులు మరణించిన సంగతి తెలిసిందే. తాజాగా ట్రుగ్లియా కూడా హెలికాప్టర్ నుంచి దూకి ప్రాణాలు కోల్పోవడం గమనార్హం.