కేంద్ర ప్రభుత్వ పిలుపు మేరకు డిజిటల్‌ ఇండియాను ఆవిష్కృతం చేసేందుకు గోవా రాష్ట్రం ముందడుగు వేస్తోంది. ఉచిత ఇంటర్నెట్‌ డేటా, టాక్‌టైంను రేపటి నుంచి గోవాలోని యువతకు అందించనుంది. 'గోవా యువ సంచార్‌ యోజన' పథకాన్ని సోమవారం ప్రవేశపెట్టనున్నారు. ఈ పథకం కింద 16-30 ఏళ్ల వయస్సు ఉన్న వారందరికీ కొత్త సిమ్‌ పంపిణీ చేసి దాని ద్వారా 100 నిమిషాల టాక్‌టైం, 3జీబీ ఇంటర్నెట్‌ డేటాను ఉచితంగా అందించనున్నట్లు రాష్ట్ర ముఖ్యమంత్రి లక్ష్మీకాంత్‌ పర్సేకర్‌ వెల్లడించారు. ఈ మేరకు వొడాఫోన్‌తో ఒప్పందం చేసుకున్నట్లు చెప్పారు.

ఈ పథకం ద్వారా దాదాపు 1.25లక్షల మందికి లబ్ధి చేకూరనుంది. ఈ పథకానికి నవంబర్‌ 25వ తేదీన గోవా రాష్ట్ర క్యాబినెట్‌ ఆమోదం తెలిపినట్లు పర్సేకర్‌ తెలిపారు. డిజిటల్‌ ఇండియా కార్యక్రమంలో అన్ని రాష్ట్ర ప్రభుత్వాలు భాగస్వాములు కావాలని కేంద్రం ఇచ్చిన పిలుపు మేరకు ఈ నిర్ణయం తీసుకున్నట్లు ఆయన వెల్లడించారు.