తన దంగల్ మూవీ ప్రమోషన్ కోసం హైదరాబాద్ వచ్చిన బాలీవుడ్ స్టార్ ఆమిర్ ఖాన్..టాలీవుడ్ పట్ల తనకున్న అభిమానాన్ని చాటుకున్నాడు. తెలుగు సినీ పరిశ్రమలో మీరెవరితో కలిసి నటించాలనుకుంటున్నారన్నప్రశ్నకు.. తడుముకోకుండా సమాధానమిచ్చాడు. నేను మెగాస్టార్ చిరంజీవి, పవర్ స్టార్ పవన్ కళ్యాణ్ లకు వీరాభిమానినని, వారితో కలిసి నటించేందుకు ఎంతో ఇష్టపడతానని తెలిపాడు.
అంతేకాదు.. బాహుబలి మూవీ దర్శక ధీరుడు రాజమౌళి దర్శకత్వంలో ఓ చిత్రం చేయాలని కూడా ఉందన్నాడు. భవిష్యత్తులో జక్కన్న మహాభారతం సినిమా తీస్తే..అందులో కర్ణుడి పాత్రనో, కృష్ణుడి రోల్ నో పోషించడానికి ఎప్పుడూ సిద్ధంగా ఉంటానని ఆమిర్ చెప్పాడు. యంగ్ ఇండియన్స్ అండ్ యూత్ లీడర్ షిప్ అనే అంశంపై జరిగిన చర్చాగోష్టిలో ఈ నటుడు పాల్గొన్నాడు.
దంగల్ మూవీ డైరెక్టర్ నితేష్ తివారీ, మరి కొందరు స్టార్స్ కూడా ఈ గోష్టికి హాజరయ్యారు. హర్యానా లోని రెజ్లర్ మహావీర్ సింగ్ ఫోగత్ జీవిత చరిత్ర ఆధారంగా నిర్మించిన ఈ సినిమా ఈ నెల 23 న ప్రపంచ వ్యాప్తంగా రిలీజ్ కానుంది.