హైదరాబాద్‌: సినీ నటుడు, హిందూపురం శాసనసభ్యుడు నందమూరి బాలకృష్ణ శుక్రవారం తెలంగాణ అసెంబ్లీలోకి వెళ్లారు. ఈ సందర్భంగా తెతెదేపా నేత రేవంత్‌రెడ్డి ఆయనకు స్వాగతం పలికారు. ముఖ్యమంత్రి కేసీఆర్‌ను కలవడానికి వచ్చిన బాలకృష్ణ.. నేరుగా అసెంబ్లీలోని తెదేపా కార్యాలయానికి వెళ్లారు. 'గౌతమిపుత్ర శాతకర్ణి'కి తెలంగాణలో రాయితీ ఇచ్చినందుకు సీఎం కేసీఆర్‌కు బాలకృష్ణ ధన్యవాదాలు తెలపనున్నారు.
క్రిష్‌ దర్శకత్వంలో బాలకృష్ణ కథానాయకుడిగా నటించిన చారిత్రక చిత్రం 'గౌతమిపుత్ర శాతకర్ణి'. శ్రియ కథానాయిక. హేమమాలిని కీలక పాత్ర పోషిస్తున్నారు.
ఇప్పటికే చిత్రీకరణ పూర్తి చేసుకున్న ఈ చిత్రం సంక్రాంతి కానుకగా ప్రేక్షకుల ముందుకు రానుంది. బాలకృష్ణ సినీ కెరీర్‌లో నటించిన 100వ చిత్రం కావడంలో అటు అభిమానుల్లోనూ, ఇటు చిత్ర పరిశ్రమలోనూ భారీ అంచనాలు నెలకొని ఉన్నాయి.