నాచురల్ స్టార్ 'నాని', దర్శకుడు 'హనురాఘవపూడి' ల కాంబినేషన్ లో మరో చిత్రం వరుసగా 'కృష్ణ గాడి వీర ప్రేమగాధ' ', 'జెంటిల్ మాన్', 'మజ్ను' 'నేను లోకల్ ' వంటి సినిమాలతో మంచి ఊపు మీదున్న నాని తన కొత్త సినిమాకు గ్రీన్ సిగ్నల్ ఇచ్చాడు. నూతన యువ నిర్మాతలు శ్రీనివాస ప్రసాద్ చుక్కపల్లి, సుధాకర్ చెరువూరి సంయుక్తంగా ఓ చిత్రాన్ని నిర్మించటానికి సన్నాహాలు చేస్తున్నారు. 'నాని' హీరోగా తెరకెక్కి హిట్ టాక్ తెచ్చుకున్న 'కృష్ణ గాడి వీర ప్రేమగాధ' చిత్ర దర్శకుడు హను రాఘవపూడితో మరోసారి నాని సినిమా రూపొందుతోంది. హీరో నాని, తన కాంబినేషన్ లో మరో చిత్రం రూపొందనుండటం సంతోషంగా ఉందని దర్శకుడు హను తెలిపారు.

ఈ చిత్రానికి సుప్రసిద్ధ సంగీత దర్శకుడు 'మణిశర్మ' సంగీతం అందిస్తుండగా, కెమెరామెన్‌గా 'యువరాజ్‌ను' (కృష్ణ గాడి వీరప్రేమగాధ, ప్రస్తుతం హీరో నితిన్, హనురాఘవపూడిల సినిమాల కెమెరామెన్) ఎంపిక చేశారు. చిత్రంలోని ఇతర నటీ,నటులు, సాంకేతిక నిపుణుల వివరాలు త్వరలోనే మీడియాకు తెలియజేస్తామని నిర్మాతలు చెప్పారు. 2017 ఆగస్టు నెలలో చిత్రం షూటింగ్ కార్యక్రమాలు ప్రారంభమవుతాయని చిత్ర నిర్మాతలు శ్రీనివాస ప్రసాద్ చుక్కపల్లి, సుధాకర్ చెరువూరి తెలిపారు.