మనామా: సోషల్ మీడియాలో ప్రజా నైతిక విలువలకు విరుద్ధంగా భావించిన కంటెంట్‌ను ప్రచురించినందుకు 31 ఏళ్ల అరబ్ జాతీయుడిని బహ్రెయిన్ అధికారులు అరెస్టు చేశారు. అవినీతి నిరోధక, ఆర్థిక మరియు ఎలక్ట్రానిక్ భద్రత ప్రధాన డైరెక్టరేట్ (General Directorate of Anti-Corruption, Economic and Electronic Security) ఈ అరెస్టు చేసినట్లు అంతర్గత వ్యవహారాల మంత్రిత్వ శాఖ వెల్లడించింది. కేసుకు సంబంధించిన చట్టపరమైన ప్రక్రియలు కొనసాగుతున్నాయని, అనంతరం పబ్లిక్ ప్రాసిక్యూషన్‌కు అప్పగించనున్నట్లు తెలిపింది.

సోషల్ మీడియాను వినియోగించే సమయంలో చట్టాలు, నిబంధనలను పాటించాలని, బాధ్యతాయుతంగా వ్యవహరించాలని అధికారులు ప్రజలకు సూచించారు. చట్టాలను ఉల్లంఘించే లేదా బహ్రెయిన్ సమాజ ప్రతిష్ఠకు భంగం కలిగించే పోస్టులు లేదా కంటెంట్‌ను ప్రచురించడం, షేర్ చేయడం మానుకోవాలని హెచ్చరించారు. సామాజిక శాంతి, ప్రజా విలువలను కాపాడేందుకు సోషల్ మీడియాను దుర్వినియోగం చేసే వారిపై కఠిన చట్టపరమైన చర్యలు తీసుకుంటామని అంతర్గత వ్యవహారాల మంత్రిత్వ శాఖ స్పష్టం చేసింది.