ఎప్పుడెప్పుడు బ్రూస్ లీ సినిమా సెట్ లో చిరంజీవి.. ఎంటర్ అవుతాడా అని ఎదురుచూస్తున్న అభిమానులకు గుడ్ న్యూస్. ఆల్రెడీ మెగాస్టార్... బ్రూస్ లీ షూటింగ్ లో జాయిన్ అయ్యాడు. ఈ విషయాన్ని రామ్ చరణే కన్ఫమ్ చేశాడు. ఆరేళ్ల విరామం తర్వాత మళ్లీ ముఖానికి మేకప్ వేసుకున్నారు చిరంజీవి. ఏడేళ్లక్రితం రాజకీయరంగ ప్రవేశంతో.. నటనకు విరామం ప్రకటించిన చిరంజీవి.. తన కొడుకు రామ్ చరణ్ కోసం.. కాసేపు మగధీర సినిమాలో కనిపించారప్పుడు. మళ్లీ ఇప్పుడు రామ్ చరణ్ సినిమాతోనే తిరిగి సినిమాల వైపు అడుగులు వేస్తున్నారు మెగాస్టార్. రామ్ చరణ్ హీరోగా శ్రీనువైట్ల దర్శకత్వంలో తెరకెక్కుతున్న బ్రూస్ లీ సినిమాలో కాసేపు అతిథి పాత్రలో కన్పించబోతున్నారు చిరంజీవి. చివరిదశకు చేరుకున్న ఈ సినిమా షూటింగ్ లోగా.. ఈ సోమవారం నుంచి చిరంజీవి కూడా పాల్గొంటున్నారు. చిరంజీవి, రామ్ చరణ్ కాంబినేషన్ లో కీలక సన్నివేశాల చిత్రీకరణ ప్రస్తుతం జరుగుతోంది. మూడు రోజుల పాటు చిరంజీవికి సంబంధించిన సన్నివేశాల చిత్రీకరణ జరగబోతున్నట్టు ఇప్పటికే దర్శకుడు శ్రీనువైట్ల ప్రకటించారు. ఈ నెల 28 నుంచి 30వ తేదీ వరకూ ఈ షూటింగ్ జరగనుంది. సినిమాలో చిరంజీవి కేవలం మూడు నిమిషాల పాటే కనిపిస్తారని యూనిట్ సభ్యులు చెప్పారు... ఈ మూడు నిమిషాల యాక్షన్ ఎపిసోడ్ కోసం రామ్-లక్ష్మణ్ పర్యవేక్షణలో చిరంజీవి, కొందరు ఫైటర్స్ పై పోరాట సన్నివేశాలను చిత్రీకరిస్తున్నారు... అక్టోబర్-2న ఆడియో రిలీజ్ వేడుక నిర్వహించేందుకు సన్నాహాలు జరుగుతున్నాయి. చిరు నటిస్తున్న ఈ యాక్షన్ సీక్వెన్స్ కేవలం 150 వ సినిమాకు టీజర్ మాత్రమేనన్న రామ్ చరణ్... తండ్రితో షూటింగ్ చాలా సంతోషంగా ఉందని.. బ్రూస్ లీ చిత్రంలో భాగమైనందుకు ఫుల్ హ్యాపీ అంటూ మెగాస్టార్ కు స్వాగతం పలికాడు. రామ్ చరణ్ తొలిచిత్రం చిరుత విడుదలైన సెప్టెంబర్-28నే.. చిరంజీవి మళ్ళీ షూటింగ్ లో పాల్గొనడం విశేషం. ఇక గతంలో రామ్ చరణ్ సినిమాలో చిరంజీవి గెస్ట్ రోల్ లో కనిపించిన మగధీర బ్లాక్ బస్టర్ హిట్ సాధించింది. మరి.. బ్రూస్ లీ విషయంలోనూ ఈ మ్యాజిక్ రిపీట్ అవుతుందేమో చూద్దాం..!