నూతన దర్శకుడు మోహన్‌రావు తెరకెక్కిస్తున్న ‘కొత్త కుర్రోడు’ పాటలు మినహా చిత్రీకరణ పూర్తిచేసుకుంది. శ్రీరామ్‌, శ్రీప్రియ, మహేంద్ర, ఆశ ప్రధాన పాత్రల్లో నటిస్తున్నారు. బుధవారం హైదరాబాద్‌లో నిర్వహించిన పాటల రికార్డింగ్‌ కార్యక్రమానికి తెలంగాణ ఫిలిం ఛాంబర్‌ అధ్యక్షుడు ప్రతాని రామకృష్ణగౌడ్‌ ముఖ్యఅతిథిగా హాజరయ్యారు. ఈ సందర్బంగా ఆయన ‘నవతరాన్ని ప్రోత్సహిస్తూ ఈ యూనిట్‌ చేస్తున్న ప్రయత్నం అభినందనీయం.. పెద్ద విజయం అందుకోవాలి’ అని ఆకాక్షించారు. దర్శక నిర్మాతలు మాట్లాడుతూ ‘అంతా కొత్త కుర్రాళ్లతో తెరకెక్కిస్తున్న చిత్రమిది. సినిమా చాలా బాగా వస్తోంది. పాటలు మినహా చిత్రీకరణ పూర్తైంది. త్వరలోనే పాటల్ని తెరకెక్కిస్తున్నాం’ అని చెప్పారు.సాయి సంగీతం అందిస్తున్న ఈ చిత్రాన్ని లైట్‌ఆఫ్‌లవ్‌ క్రియేషన్స్‌ పతాకంపై లక్ష్మణ్‌ పదిలం నిర్మిస్తున్నారు.