కర్నాటక సంతతికి చెందిన వాడంటూ తనపై విమర్శలు సంధిస్తున్నవారికి తమిళ సూపర్‌స్టార్ రజినీకాంత్ గట్టికౌంటర్ ఇచ్చారు. శుక్రవారం తన అభిమానులను కలుసుకున్న సందర్భంగా ఒకింత భావోద్వేగంతో మాట్లాడారు. తొలిరోజు మాట్లాడిన దానికంటే కాస్త స్వరం పెంచి తన మనసులో మాట కుండబద్దలు కొట్టినట్టు చెప్పారు. ''కర్నాటకలో నేను 23 యేళ్లు ఉన్నాను. తమిళనాడులో 43 సంవత్సరాలుగా నివసిస్తున్నాను. నేను కర్నాటక నుంచి వచ్చినా... మీరు సాదరంగా ఆహ్వానించారు. నన్ను నిజమైన తమిళుడిగా మార్చారు..'' అని రజినీ వ్యాఖ్యానించారు.
పనిలో పనిగా ప్రస్తుత రాజకీయాలపైనా తనదైన శైలిలో స్పందించారు. ''ప్రస్తుత రాజకీయ వ్యవస్థ ప్రజల గురించి ఆలోచించడం లేదు. ప్రజలంటే కనీసం పట్టింపు కూడా లేదు. ఈ పరిస్థితి మారాలి'' అని రజినీ పేర్కొన్నారు. అందరిలాగానే తనకు పనులు, బాధ్యతలు ఉన్నాయనీ ప్రస్తుతం వాటి మీద దృష్టి పెడదామన్నారు. అయితే తప్పనిసరిగా పోరాటం చేయాల్సివస్తే మాత్రం.. అందరం కలిసికట్టుగా ముందుకెళ్దామని పిలుపునిచ్చారు.
తాజా వ్యాఖ్యలతో ఆయన రాజకీయాల్లోకి రావడం తథ్యమన్న వాదనలకు బలం చేకూరినట్టయింది. అయితే రాజకీయ రంగప్రవేశంపై రజినీ ఇంకాస్పష్టతా ఇవ్వకపోవడంతో సస్పెన్స్ అలానే కొనసాగుతోంది. ఆయన రాజకీయాల్లోకి వస్తున్నారంటూ జరుగుతున్న ప్రచారంపై మీడియా గురువారం రజినీకాంత్‌ను ప్రశ్నించగా.... ''దయచేసి రాజకీయంపై ప్రశ్నలు అడగకండి'' అని పేర్కొన్న సంగతి తెలిసిందే.