మన సినిమా కథలు ఎప్పుడూ హీరోల చుట్టూనే తిరుగుతుంటాయి. తరతరాలుగా ఇది మారని సత్యం. ఏ సినిమా కథ అయినా హీరో ఇమేజ్ ను మరింత బిల్డప్ చేయడానికి దోహదపడేదిగానే తయారు చేస్తారు. ఇది ఎవరూ కాదనలేరు. ఒకవేళ ఎవరైనా మంచి కథ రాసినా దానిని హీరో ఇమేజ్ చట్రంలోకి మౌల్డ్ చేసేస్తారు. అయితే మన హీరోలు ఇప్పుడిప్పుడే ఇమేజ్ చట్రం నుంచి బయటపడుతున్నట్టు కనిపిస్తోంది. 

తమిళంలోనూ, మలయాళంలోనూ హీరో ఇమేజ్ కన్నా బలమైన కథకు ప్రాధాన్యత ఇస్తున్నారు. రొటీన్ ఫార్ములా సినిమాలు కాక మంచి సినిమాలు వస్తున్నాయి. దర్శకులూ వాటినే ప్రిఫర్ చేస్తున్నారు. మనసును కదిలించే కథలను సిద్ధం చేయడం .. ఆ కథలను తెరపై అద్భుతంగా ఆవిష్కరించడంలో మలయాళ దర్శకుడు ప్రియదర్శన్ సిద్ధహస్తుడు. 

తమిళం, మలయాళం, హిందీ భాషల్లో ఆణిముత్యాల్లాంటి సినిమాలను ప్రియదర్శన్ తీశాడు. రీసెంట్ గా మలయాళంలో మోహన్ లాల్ ప్రధాన పాత్రగా 'ఒప్పం' సినిమాను ప్రేక్షకులకి అందించాడు. వైవిధ్యభరితమైన సినిమాగా ప్రశంసలు అందుకున్న ఈ సినిమా, కాసుల వర్షం కురిపించింది. దాంతో తన కోసం ఒక మంచి కథని రెడీ చేయమని ఆయనని వెంకటేశ్ కోరాడట.

వెంకటేష్ కోరినదానికి పాజిటివ్ గా స్పందించిన ప్రియదర్శన్ అదే పనిలో ఉన్నాడని అంటున్నారు. ఆ కథ వెంకటేశ్ కి నచ్చితే .. ఈ కాంబినేషన్లో ఓ సినిమాకు త్వరలోనే ముహూర్తం కుదురుతుందని అనుకుంటున్నారు.