రోడ్డు ప్రమాదాల్ని చిత్రీకరిస్తే, ఆ నేరానికిగాను మీరు జైలుకు వెళ్ళాల్సి రావొచ్చు. ఎంపీలు కొత్త చట్టం దిశగా సమాలోచనలు చేస్తున్న దరిమిలా, ఆ చట్టం అమల్లోకి వస్తే ప్రమాదాల పట్ల అత్యుత్సాహం చూపేవారికి జైలు శిక్ష తప్పదు. ఈ అంశానికి సంబంధించి ఫారిన్‌ ఎఫైర్స్‌, డిఫెన్స్‌ మరియు నేషనల్‌ సెక్యూరిటీ కమిటీ ప్రిపేర్‌ చేసిన రిపోర్ట్‌, హౌస్‌ ఆఫ్‌ రిప్రెజెంటేటివ్స్‌లో చర్చకు వస్తుంది. ఎంపీ మొహమ్మద్‌ అల్‌ మారిఫి, గత ఏడాది దీనికి సంబంధించి ఓ ప్రపోజల్‌ని కమిటీకి అందజేశారు. ఈ నేపథ్యంలో, కమిటీ పలు అంశాల్ని పరిశీలించింది. కమ్యూనికేషన్‌ టెక్నాలజీ విభాగంలో వింత పోకడలు మానవత్వానికి మాయని మచ్చలా కొన్ని సందర్భాల్లో మారుతున్నాయని అల్‌ మరాఫి చెప్పారు. అత్యంత దయనీయ స్థితిలో ప్రమాద బాధితులు ఉన్నప్పుడు, వారి దీన స్థితిని కెమెరాల్లో బంధించడం, వాటిని పబ్లిష్‌ చేయడం క్రూరత్వం కింద భావించాలని ఆయన అంటున్నారు. గురువారం జరిగే సమావేశంలో చర్చించిన అనంతరం, షురా కౌన్సిల్‌ అలాగే ప్రభుత్వానికి తదుపరి అనుమతి కోసం ఈ అంశం పంపబడుతుంది.