షార్జాలోని అల్‌ నాజర్‌ టవర్‌లో ఇటీవల జరిగిన అగ్ని ప్రమాదంతో అందులో నివాసం ఉంటోన్నవారికి ఇప్పుడు పార్కులే ఆశ్రయాలుగా మారాయి. వేరే చోట నివాసముండటానికి తగిన మొత్తం వెచ్చించలేక, పార్కుల్లో నివాసం ఉండాల్సి వస్తోందని బాధిత కుటుంబాలు ఆవేదన చెందుతూ చెప్పాయి. అగ్ని ప్రమాదానికి పూర్తి కారణాలు తెలియగానే, బాధిత కుటుంబాలను ఆదుకునేందుకు ప్రయత్నిస్తామని షార్జా మున్సిపాలిటీ అధికారులు చెప్పారు. ఫైర్‌ సేఫ్టీ మరియు సెక్యూరిటీ విభాగం సరిగా పనిచేయడంలేదని ప్రాథమిక విచారణలో తేలిందని సివిల్‌ డిఫెన్స్‌ అధికారి బ్రిగేడియర్‌ అబ్దుల్లా అల్‌ సువాది చెప్పారు. రెడ్‌ క్రిసెంట్‌ అథారిటీ డైరెక్టర్‌ ఖామిస్‌ అల్‌ సువాదీ మూడు రోజుల్లోనే బాధితులకు ప్రత్యామ్నాయ నివాసాలు సమకూర్చాలనుకున్నా కొన్ని కారణాలతో అది వీలు పడలేదన్నారు. మొత్తం 150 కుటుంబాలు అగ్ని ప్రమాదంతో గూడును కోల్పోయాయి. అగ్ని ప్రమాదం సంభవించిన కారణంగా ఓనర్‌, నెలవారీ అద్దెను తీసుకోవడానికి వీల్లేదని, అక్టోబర్‌లో తీసుకున్న చెక్కులు తిరిగిచ్చేయాలని అధికారులు ఆదేశించారు.