ఒక ప్రాజెక్టులో పనులు పూర్తైన అనంతరం, శ్రామికులను మరో ప్రోజెక్టుకు తరలించే విధానం కతార్ కు ఎంతో లాభదాయకమని శ్రామిక మరియు సాంఘిక వ్యవహారాల మంత్రిత్వ శాఖ వారి శాశ్వత నియామక కమిటీ, తన అధ్యయనంలో కనుగొన్నట్టు కమిటీ ఛైర్మన్ అబ్దుల్లా అల్-దెహైమీ వెల్లడించారు. ఈ విధానం - ఇటు శ్రామికులకు వివిధ పనులలో మంచి అనుభవం రావడంతో బాటు, దేశంలో నిర్మాణ మరియు మౌలిక రంగాలలో ప్రోజెక్టులు భారీ స్థాయిలో అమలులోకి రానున్నందువలన దేశానికీ లాభదాయకమని ఆయన విశ్లేషించారు. నైపుణ్య పరంగా నేపాలీయులకు మంచి డిమాండ్ ఉందని, అనంతరం భారత మరియు బంగ్లా దేశీయులు వస్తారని, తమ కమిటీకి వివిధ దేశస్తుల నుండి  వారానికి 500 నుండి 700 దరఖాస్తులు వస్తున్నాయని చెబుతూ, ఏ దేశం పైనా కతార్ నిషేధం విధించలేదని ఆయన స్పష్టం చేశారు.