కేంద్రమంత్రి సుష్మాస్వరాజ్‌ సాయం చేసే గుణానికి మన భారతీయులే కాదు పాకిస్థానీలూ ఫిదా అయిపోయారు. తాజాగా ఓ పాక్‌ మహిళకి సుష్మా సకాలంలో సాయం చేసి ఆదుకున్నారు. దాంతో ఆమె తీవ్ర ఉద్వేగానికి లోనై సుష్మాను పొగడ్తలతో ముంచెత్తుతోంది.
హిజాబ్‌ అసీఫ్‌ అనే మహిళ కాలేయ సమస్యతో బాధపడుతోంది. వెంటనే ఆమె భారత్‌లో చికిత్స చేయించుకోవాల్సి ఉంది. ఇందుకోసం హిజాబ్‌ మెడికల్‌ వీసా కోసం ఇస్లామాబాద్‌లోని డిప్యూటీ హైకమిషనర్‌ను ఆశ్రయించింది. కానీ ఇందుకు కమిషనర్‌ ఒప్పుకోలేదు. దాంతో హిజాబ్‌ సుష్మా స్వరాజ్‌ను ఆశ్రయించింది.
‘మేడమ్‌.. నాకు కాలేయ సమస్య ఉంది. భారత్‌లో చికిత్స చేయించుకోవాలి. మెడికల్‌ వీసా కావాలని అడిగితే అది మీరే చూసుకోవాలని అంటున్నారు. నాకు సాయం చేయండి’ అని ట్వీట్‌చేసింది. ఎప్పటిలాగే వెంటనే స్పందించిన సుష్మా.. మెడికల్‌ వీసా వచ్చేలా డిప్యూటీ హైకమిషనర్‌ను ట్విటర్‌లో ఆదేశించింది.
వెంటనే స్పందించి తనకు సాయం చేసిన సుష్మాపై హిజాబ్‌ ప్రశంసల జల్లులు కురిపించింది. ‘సుష్మాజీ.. ఏమని పిలవను మిమ్మల్ని? సూపర్‌విమెన్‌ అనాలా లేక దేవత అని సంబోధించాలా? మీ మంచితనాన్ని వివరించడానికి మాటలు రావడంలేదు. లవ్యూ మేడమ్‌. కన్నీళ్లతో మిమ్మల్ని పొగడటం ఆపలేను. నా గుండె మీకోసమే కొట్టుకుంటోంది.మీరు మా ప్రధాని అయివుంటే ఎంత బాగుండో. అయినా మీలాంటి ప్రధానిని పొందే అర్హత పాక్‌కు లేదు’ అని ట్వీట్‌ చేసింది.