టెక్‌ దిగ్గజం ఫేస్‌బుక్‌కు చాట్‌బోట్స్‌(ఇంటర్నెట్‌ ద్వారా మనుషులతో మాట్లాడటానికి ఉపయోగించే ఒక కంప్యూటర్‌ ప్రోగ్రామ్‌) షాక్‌ ఇచ్చాయి. ఆర్టిఫిషియల్‌ ఇంటెలిజెన్స్‌(ఏఐ) సాంకేతికతతో ఆ కంపెనీ తయారు చేసుకున్న చాట్‌బోట్స్‌ .. ఫేస్‌బుక్‌ ఉద్యోగులు ఇచ్చిన ఆదేశాలను ఉల్లంఘించాయి. అంతేకాదు అవి సొంతగా అభివృద్ధి చేసుకున్న భాషలో ఇష్టం వచ్చినట్లు మాట్లాడుకోవడం ప్రారంభించాయి. దీంతో అవాక్కవడం ఫేస్‌బుక్‌ ఉద్యోగుల వంతైంది.

ఏం చేయాలో పాలుపోని చాట్‌బోట్స్‌ ఏఐను వెంటనే నిలిపేసింది ఫేస్‌బుక్‌. ఈ మేరకు ఓ అంతర్జాతీయ పత్రిక ఆదివారం కథనాన్ని ప్రచురించింది. ఆర్టిఫిషియల్‌ ఇంటిలిజెన్స్‌ చాట్‌బోట్స్‌ ఫేస్‌బుక్‌ పరిశోధకుల మాట వినకుండా వాటి ఇష్టం వచ్చినట్లు ప్రవర్తించినట్లు చెప్పింది. దీంతో షాక్‌కు గురైన పరిశోధకులు వెంటనే ఆ ఏఐను నిర్వీర్యం చేశారని తెలిపింది.

అయితే, చాట్‌బోట్స్‌ ఫేస్‌బుక్‌ ఆఫీస్‌లోని కంప్యూటర్లకు ఎలాంటి హాని తలపెట్టలేదని వెల్లడించింది. ఫేస్‌బుక్‌ పరిశోధకులు డీఫాల్ట్‌గా ఇచ్చిన ఇంగ్లీష్‌ భాషను వదిలేసి తన సొంతగా అభివృద్ధి చేసుకున్న మరొక భాషలో సంభాషించడం మొదలుపెట్టినట్లు వివరించింది. పరిశోధకులు ఇంగ్లీష్‌లో మాట్లాడాలని ఏఐకు సూచించినా.. ఆ సూచనలను ఏఐ ఖతరు చేయలేదని వెల్లడించింది. కాగా, టెస్లా మోటార్స్‌, స్పేస్‌ ఎక్స్‌ కంపెనీల యజమాని ఎలాన్‌ మస్క్‌ ఆర్టిఫిషియల్‌ ఇంటెలిజెన్స్‌(ఏఐ)పై అనుమానాలు వ్యక్తం చేసిన విషయం తెలిసిందే.