ఆర్‌. నారాయణమూర్తి నటిస్తూ స్వీయ దర్శకత్వంలో సామాజిక సమస్యలే ఇతివృత్తాలుగా చిత్రాలు తీస్తుంటారు. ఇప్పుడాయన మరో కొత్త ప్రయత్నం చేస్తున్నారు. అదే... ‘అన్నదాత సుఖీభవ’. ఈ సందర్భంగా మంగళవారం హైదరాబాద్‌లో ఏర్పాటైన విలేకర్ల సమావేశంలో ఆర్‌. నారాయణమూర్తి మాట్లాడుతూ ‘‘ఈ నెల 4న పశ్చిమగోదావరి జిల్లాలో చిత్రీకరణ ప్రారంభిస్తాం. అందరికీ అన్నం పెట్టే రైతు లేనిదే రాజ్యం లేదు. కానీ ఈనాడు ఆ రైతు ఆత్మహత్యలు చేసుకుంటున్నాడు. పంటకి గిట్టుబాబు ధర లభించకపోవడమే ఇందుకు ప్రధానకారణం. ఈ సమస్యే నా చిత్రానికి ఇతివృత్తం. రైతు ఆత్మహత్యలు ఆగాలంటే గిట్టుబాటు ధరల్ని అందించాల్సిందే. ఆ బాధ్యత మన కేంద్ర, రాష్ట్ర ప్రభుత్వాలదే. ఈ విషయాన్నే నా చిత్రం ద్వారా చెబుతున్నాను. దేశవ్యాప్తంగా పేరుకుపోయిన దళారీ వ్యవస్థను సమూలంగా నిర్మూలిస్తేనే రైతులకి గిట్టుబాటు ధరలు లభిస్తాయి. 11 పాటలున్నాయి.  రికార్డింగ్‌ కూడా పూర్తయింద’’న్నారు.