బతుకమ్మ పండుగ సందర్భంగా తెలంగాణ ప్రభుత్వం, పేదింటి ఆడపడుచులకు చీరల పంపిణీ కార్యక్రమాన్ని చేపట్టింది. ఈ మేరకు 18 ఏళ్ళు పైబడిన యువతులు, మహిళలకు చీరలను పంపిణీ చేసేందుకు ప్రభుత్వం ఆదేశాలు జారీ చేసింది. దీనిలో భాగంగా బతుకమ్మ చీరలు పౌరసరఫరాల శాఖ గోదాములకు చేరుతున్నాయి. ఈనెల 18 నుంచి రేషన్‌ దుకాణాల ద్వారా వీటిని పంపిణీ చేసేందుకు అధికారులు ఏర్పాట్లు చేస్తున్నారు. నిజామాబాద్‌ జిల్లాలో 9,72,274 మంది జనాభాలో 8,15,115 మందికి ఆహార భద్రత కార్డులు ఉన్నాయి. ఈ కార్డుదారుల జాబితాలో 4,40,216 మంది మహిళలు ఉండగా వీరిలో 18 ఏళ్ళ పైబడిన వారు 3,31,214 మంది ఉన్నారు.

ఆధార్‌ కార్డు, రేషన్‌ కార్డు తప్పనిసరి
బతుకమ్మ చీరలను తీసుకునేందుకు వచ్చే మహిళలు తమ ఆహార భద్రత కార్డుతోపాటు ఆధార్‌ కార్డు జిరాక్స్‌ ప్రతులను తీసుకుని రావాల్సి ఉంటుంది. జిరాక్స్‌ ప్రతులను రేషన్‌ దుకాణదారుడికి అందజేసి చీరలను తీసుకోవాలి. వయసు ధృవీకరణతోపాటు వ్యక్తిని గుర్తించేందుకు ఆధార్‌ కార్డును జత చేయాల్సి ఉంది.