రస్‌ అల్‌ ఖైమా: రస్‌ అల్‌ ఖైమా పోలీస్‌ చేపట్టిన విచారణలో ఆత్మహత్యగా నమోదైన ఓ కేసు హత్య అని వెలుగు చూసింది. క్రిమినల్‌ ఇన్వెస్టిగేషన్‌ డిపార్ట్‌మెంట్‌ ఈ కేసుని ఛేదించింది. 24 గంటల్లోనే అది ఆత్మహత్య కాదు, హత్య అని తేల్చింది సిఐడి. సిఐడి డైరెక్టర్‌ కల్నల్‌ అబ్దుల్లా అల్‌ ముంకిస్‌ మాట్లాడుతూ, ఆత్మహత్య కేసుని ఛేదించి కేవలం 24 గంటల్లోనే నిందితుడ్ని అదుపులోకి తీసుకున్నట్లు చెప్పారు. ఆసియాకి చెందిన కార్మికుడి మృతదేహం, తాడుకి వేలాడుతూ కన్పించింది. ఈ ఘటనపై ఫిర్యాదు అందుకున్న పోలీసులు విచారణ చేపట్టి, అది ఆత్మహత్య కాదని తేల్చారు. ఆసియాకి చెందిన మరో వ్యక్తిని నిందితుడిగా తేల్చారు. ఇద్దరి మధ్యా చోటుచేసుకున్న వాగ్యుద్ధమే ఈ హత్యకు కారణమని పోలీసులు నిర్ధారించారు.