సుష్మాస్వరాజ్‌.. యావత్‌ భారతీయులకు పరిచయం అక్కర్లేని పేరు. కేంద్ర విదేశాంగ శాఖ మంత్రిగా తన బాధ్యతలు సమర్థంగా నిర్వహిస్తూనే ఎన్నోసార్లు మానవత్వాన్ని చాటుకున్నారు. ఆపదలో ఉన్నామంటూ ఒక్క ట్వీట్‌ చేస్తే చాలు ప్రపంచంలో ఏ మూలన భారతీయలు ఉన్నా క్షణాల్లో ఆమె నుంచి సాయం అందుతుంది. అందుకు 'ఉజ్మా' ఘటన వంటి ఉదాహరణలు ఎన్నో.. కేవలం స్వదేశీయులే కాదు.. సాయం కోరి వచ్చిన విదేశీయులకు సైతం ఆపన్న హస్తం అందిస్తుంటారు. అందుకు నిదర్శనమే ఈ ఘటన.
తమ ఏడేళ్ల చిన్నారికి భారత్‌లో ఓపెన్‌హార్ట్‌ సర్జరీ చేయించేందుకు పాకిస్థాన్‌కు చెందిన ఓ మహిళ గత ఆగస్టులో వీసాకు దరఖాస్తు చేసుకుంది. అయితే ఇప్పటి వరకూ వీసా జారీ చేయకపోవడంతో ఆమె సుష్వాస్వరాజ్‌ సాయం కోరింది. తమ చిన్నారికి వీసా మంజూరు చేయాలంటూ ట్వీట్‌ చేసింది. ఈ ట్వీట్‌కు స్పందించిన సుష్మాస్వరాజ్‌.. ఆ చిన్నారి మెడికల్‌ వీసాకు అనుమతినిస్తున్నట్లు ట్విటర్‌ ద్వారా వెల్లడించారు.
ఆ చిన్నారి త్వరగా కోలుకోవాలని ప్రార్థిస్తున్నట్లు సుష్మ తన ట్వీట్‌లో పేర్కొన్నారు. గతంలోనూ ఆమె ఇదే విధంగా కొందరు పాక్‌ చిన్నారులు, మహిళలకు మెడికల్‌ వీసాలు అందించిన విషయం తెలిసిందే.