అభా: నెజాద్‌కి వెళ్ళే మౌంటెయిన్‌ రోడ్‌ కోసం అక్కడి గ్రామస్థులు కలత చెందుతున్నారు. గ్రామానికి వెళ్ళే రోడ్డు ప్రమాదకరంగా మారడంతో ఇబ్బందికర పరిస్థితుల్ని ఎదుర్కొంటున్నామని వారు ఆవేదన వ్యక్తం చేస్తున్నారు. 1970 తర్వాత ఈ రోడ్డుని ఇంతవరకూ ఎవరూ పట్టించుకోలేదనేది స్థానికుల ఆరోపణ. రోడ్డుతోపాటుగా, సరైన ఇన్‌ప్రాస్ట్రక్చర్‌ లేకపోవడం, విద్యుత్‌ సమస్యలు తమను ఇబ్బంది పెడుతున్నాయని వారు చెప్పారు. అబ్దుల్లా అల్‌ అస్మారి అనే ఓ గ్రామస్తుడు మాట్లాడుతూ, సంబంధిత అధికారులు ఎందుకు తమను పట్టించుకోవడంలేదో అర్థం కావడంలేదని అన్నారు. మినిస్ట్రీ ఆఫ్‌ ట్రాన్స్‌పోర్ట్‌కి ఎన్నిసార్లు ఫిర్యాదులు చేసినా ఫలితం లేకుండా పోయిందని ఆయన ఆవేదన వ్యక్తం చేశారు. రోడ్ల దుస్థితి కారణంగా వాటర్‌ ట్యాంకులు, ట్రక్‌లు విలేజ్‌కి రాలేకపోతున్నట్లు చెప్పాడాయన. వృద్ధులు ఈ మార్గంలో ప్రయాణించడం నరకప్రాయంగా మారిందంటున్నారు. బాహ్యప్రపంచంతో విలేజ్‌కి సంబంధాలు దాదాపుగా తెగిపోయాయని ఆవేదన వ్యక్తం చేస్తున్నారు అక్కడివారు.