షార్జాలో ఓ భవనం మీద నుంచి పడి, ఓ గర్భిణి మృతి చెందింది. ప్రాథమిక విచారణ అనంతరం ఈ ఘటనను ఆత్మహత్యగా పోలీసులు నిర్ధారణకు వచ్చారు. అల్‌ మజిజ్‌ ప్రాంతంలోని ఓ హై రైజ్‌ భవనంలోగల ఏడవ అంతస్తు నుంచి 32 ఏళ్ళ భారతీయ మహిళ కింద పడిపోయింది. ఉదయం 9.30 నిమిషాల సమయంలో ఈ ఘటన జరిగినట్లు పోలీసులు తెలిపారు. ఐదేళ్ళ కుమార్తె ఉంది మృతురాలికి. ప్రస్తుతం ఆమె మూడు నెలల గర్భవతి అని ఆ భవనంలో నివసిస్తున్న వారు చెప్పారు. మృతురాలు ఆ భవనంలోని మూడో అంతస్తులో నివసిస్తుండగా, తన స్నేహితురాలిని కలిసేందుకు ఏడో అంతస్తులోకి వెళ్ళింది. అక్కడ ఆమె, తన స్నేహితురాలితో మాట్లాడుతూ, మంచి నీళ్ళు కావాలని అడగడం, స్నేహితురాలు అలా వెళ్ళగా ఆమె భవనం నుంచి కిందికి దూకేసిందని తెలియవస్తోంది. మృతురాలి సంబంధీకుల్ని పోలీసులు విచారిస్తున్నారు.