బెంగళూరు మళ్లీ మునిగింది. రాత్రి కుండపోత వర్షం కురిసింది. లోతట్టు ప్రాంతాలన్నీ నీట మునిగాయి. పలు కాలనీల్లో ఇళ్లలోకి వర్షపు నీరు చేరింది. అర్ధరాత్రి కావడంతో ఏం చేయాలో తెలీక భయాందోళనకు గురయ్యారు. చాలాచోట్ల జాగారం చేయాల్సి వచ్చింది. ఇంట్లో వస్తువులన్నీ తడిసిపోయాయి. ఇంట్లోకి వచ్చిన నీటిని బయటకు తోడినా.. బయట కూడా వర్షపునీరే ఉండడంతో అవి ఎటూ పోలేదు. దీంతో.. కష్టాలు రెట్టింపయ్యాయి.

బెంగళూరులో భారీ వర్షాలు కొనసాగుతాయని వాతావరణ శాఖ హెచ్చరించింది. దీంతో.. కార్పొరేషన్‌ సిబ్బంది అలర్ట్ అయ్యారు. లోతట్టు ప్రాంతాల్ని ఖాళీ చేయించే పనిలో పడ్డారు. ప్రజలు అప్రమత్తంగా ఉండాలని హెచ్చరికలు జారీ చేశారు. ఈమధ్యే కురిసిన వర్షంతో బెంగళూరులోని చెరువులు, కుంటలు పూర్తిగా నిండిపోయాయి. ప్రస్తుతం కురుస్తున్న వానలు ప్రమాద ఘంటికలు మోగిస్తున్నాయి.