షార్జా పోలీసులు కార్ల దొంగల ముఠాని పట్టుకున్నారు. షార్జాలోని అల్‌ మజాజ్‌, అల్‌ నధా మరియు అల్‌ తవూన్‌ ప్రాంతాల్లో పార్క్‌ చేసిన కార్లలో ఈ దొంగల ముఠా దొంగతనాలు చేస్తూ వస్తోంది. దొంగతనాలపై పలువురు బాధితులు చేసిన ఫిర్యాదుల మేరకు పోలీసులు పక్కా వ్యూహం పన్ని దొంగల ముఠాని కటకటాల వెనక్కి పంపారు. డిపార్ట్‌మెంట్‌ ఆఫ్‌ క్రిమినల్‌ ఇన్వెస్టిగేషన్‌ కొన్ని టీమ్‌లను ఏర్పాటు చేసింది ఈ ముఠాని పట్టుకునేందుకు. విచారణ సందర్భంగా నిందితుల్ని గుర్తించిన టీమ్‌లు, వారిని వ్యూహాత్మకంగా అదుపులోకి తీసుకున్నాయి. విచారణలో నిందితులు తమ నేరాన్ని అంగీకరించారు. ఎక్కువ సమయం పార్కింగ్‌లో ఉన్న వాహనాల్ని టార్గెట్‌గా చేసుకుని దొంగతనాలు చేస్తున్నట్లు నిందితులు ఒప్పుకున్నారు. ఎవరూ లేని సమయంలో కార్లను ట్రక్‌లోకి ఎక్కించి, వాటిని ఇంకో చోటకి తీసుకెళ్ళి విక్రయిస్తున్నామని నిందితులు పేర్కొన్నారు. కొన్ని కార్లను డిస్‌మాంటిల్‌ చేసి, స్పేర్‌పార్టులుగా వాటిని విక్రయిస్తున్నట్లు పోలీసులు వెల్లడించారు.